भारतविरुद्ध पाकिस्तानको सशक्त र निर्णायक जवाफ : प्रधानमन्त्री शरीफ

पाकिस्तानका प्रधानमन्त्री शहबाज शरीफले भारतको आक्रमण विरुद्ध पाकिस्तानले आज ‘संगठित, सशक्त र निर्णायक जवाफ’ दिएको बताएका छन् ।

उनका अनुसार, पाकिस्तानमाथि आक्रमण सुरु गरिएको भारतका ठूला सैन्य संरचनाहरूलाई लक्ष्य बनाइएको जिकिर गरेका छन् ।

‘आज हामीले निर्दोषहरूको रगतको बदला लिएका छौं’ प्रधानमन्त्री कार्यालयद्वारा जारी वक्तव्यमा भनिएको छ, भारतलाई उपयुक्त जवाफ दिइएको छ ।’

शरीफले पाकिस्तानले मिसाइल र ड्रोनमार्फत आक्रमण गरेको पुष्टि गर्दै यो कारबाहीलाई ‘राष्ट्रिय सुरक्षाको रक्षा’ को रूपमा प्रस्तुत गरेका छन् ।

दुवै देशका अधिकारीहरूले आक्रमणको प्रतिरक्षा गरिरहे पनि सर्वसाधारणहरू भने निकै प्रभावित भएका छन् । जम्मु–कश्मीरमा जारी तनावपूर्ण अवस्थाका कारण जम्मु रेलवे स्टेशनमा प्रवासी मजदुरहरूको भीड लागेको छ ।

भारतले पहलगाम आक्रमणको प्रतिशोधमा गरेको हवाई हमलापछि पाकिस्तानले गएराति ठूलो मात्रामा जवाफी कारबाही सुरु गर्ने निर्णय गरेको हो ।

दुई देशबीच तोपखानामा हमलामा अहिलेसम्म पाकिस्तानतर्फ १० भन्दा बढीको मृत्यु र ५० भन्दा बढी घाइतेको पुष्टि भएको अन्तर्राष्ट्रिय सञ्चारमाध्यममा उल्लेख छ ।