सिंहदरबारमा राजदूतको दौडधुप, सुधन–स्वर्णिमकै बाक्लो भेटे, चीनका कडा, बालेनको निर्देशनलाई चुनौती (भिडियोसहित)

काठमाडौं— विगतमा सरकार बन्नासाथ विभिन्न देशका राजदूतहरू बधाई तथा शुभकामना दिन प्रधानमन्त्रीलाई ‘बन्द कोठा’ भित्र भेट्ने गर्थे । तर, प्रधानमन्त्री वालेन्द्र शाह (बालेन) ले १७ देशका राजदूतसँग संयुक्त छलफल गरेर त्यो परम्परा तोडिदिए । उनले सिंहदरबारमा ती सबै राजदूतहरूसँग सामूहिक भेटघाट गर्दै स्पष्ट सन्देश दिए कि— अब राजदूतहरू सिधै प्रधानमन्त्रीको कार्यकक्षमा पुग्नुभन्दा परराष्ट्र मन्त्रालयसँग समन्वय गरे पुग्छ । प्रधानमन्त्रीले आफूसँग मात्र नभई अन्य मन्त्रीहरूको कार्यकक्षमा पनि त्यसरी नै पुग्न आवश्यक नभएको सन्देश दिएका थिए । तर, मन्त्रीहरूले भने प्रधानमन्त्रीको त्यो सन्देशलाई लत्याउँदै सिंहदरबारको बन्द कोठामा राजदूतहरूसँग भेटघाट गर्ने क्रम रोकेका छैनन् । परराष्ट्रमन्त्री बाहेक अन्य मन्त्रीहरूले पनि राजदूतहरूलाई निरन्तर भेटिरहेका छन् । यसरी मन्त्रीहरूलाई भेट्नेमा सबैभन्दा बढी जापानका राजदूत मायदा तोरु सक्रिय देखिएका छन् । उनले चार दिनको अन्तरालमा तीन जना मन्त्रीहरूसँग भेटघाट गरिसकेका छन् । उनले शिक्षा, विज्ञान तथा प्रविधि र युवा तथा खेलकुद मन्त्री सस्मित पोखरेल, भौतिक पूर्वाधार तथा यातायात र सहरी विकास मन्त्री सुनिल लम्साल र स्वास्थ्य, जनसंख्या तथा खानेपानी मन्त्री निशा मेहतासँग भेटवार्ता गरेका छन् ।