दुई बालिका हत्या प्रकरण : श्रीमान्‌बाट धेरै टर्चर भएपछि पहिले मैले विष खाएँ अनि छोरीहरूलाई खुवाइदिएँ

काठमाडौँ— मोरङको सुन्दरहरैँचा नगरपालिका–७ स्थित केरा बगानभित्र मृत फेला परेका दुई बालिकाकी आमालाई पक्राउ गरी प्रहरीले सार्वजनिक गरेको छ । जिल्ला प्रहरी कार्यालय मोरङले आज पत्रकार सम्मेलन गरी पक्राउ परेकी अस्मिता पौडेललाई सार्वजनिक गरेको हो ।

झापाको बिर्तामोडबाट पक्राउ गरी अस्मितालाई विराटनगर ल्याइएको थियो । उनले श्रीमान्‌बाट ‘धेरै टर्चर’ भएपछि छोरीहरूलाई मारेर आफू भागेको बताएकी छन् । श्रीमान्‌ले जहिले पनि ‘मारिदिने र तेरो पोस्टमार्टम गर्छु’ भन्ने गरेको प्रहरीसमक्ष बताएको मोरङ प्रहरीका एसपी नवराज कार्कीले बताए ।

उनले भनिन्, “पहिले मैले विष खाएँ, पेट पोल्न थाल्यो अनि छोरीहरूलाई खुवाइदिएँ” भन्दै प्रहरीसमक्ष बयान दिएकी छन् । छोरीहरू मरेपछि एकले अर्कोलाई अंगालो लगाइदिएर आफू भागेको अस्मिताले प्रहरीको सोधपुछका क्रममा भनेको एसपी कार्कीले जानकारी दिए ।एसपी कार्कीले भने, “अस्वस्थ्य अवस्थामा फेला परेकोले उहाँलाई अस्पताल भर्ना गरेका थियौँ । शारीरिक रूपमा निकै कमजोर देखिएको छ ।”

धनकुटाको पाख्रिबास नगरपालिका–४, डिकुरे घर भइ सुन्दरहरैँचा–७ मा बस्दै आएका अर्जुन कार्कीकी पत्नी दुई छोरीहरू एक वर्षीया आइका र तीन वर्षीया अर्पणा कार्की सुन्दरहरैँचाको केराबारीमा मृत फेला परेकै दिनदेखि बेपत्ता भएकी थिइन् । उनीहरू स्थानीय मालती टोलमा डेरा गरी बस्दथे । नजिकै घरसमेत निर्माण गरिरहेका थिए । अर्जुनले प्रहरीसमक्ष आफ्नी पत्नीले मोबाइलमा ‘तेरा छोरी मारिदिइसकेँ, म पनि मर्छु’ भनेर म्यासेज पठाएको बयान दिएका छन् । पक्राउ परेकी अस्मितालाई थुनामा राख्न चारदिनको म्याद थप भएको छ ।