काठमाडौंको ढल्कुमा गत बुधबार छिमेकी दुई समूहबीच भएको झडपमा ज्यान गुमाएका अमित पुजारीको परिवारले दोषीमाथि हदैसम्मको कारबाहीको माग गरेको छ । झडपमा परी परिवारका अन्य तीन सदस्यसमेत सिकिस्त घाइते भएको र आईसीयुमा राखेर उपचार भइरहे पनि खर्च अभावले समस्यामा परेको गुनासोसमेत गरेको छ ।
गत बुधबार काठमाडौंको ढल्कुमा फिल्मी शैलीमा एक युवकको ज्यान जाने गरी घटना घट्यो । जुन दृश्य भिडियोमा कैद नभएको भए विश्वास गर्न गाह्रो हुनेथियो । सेतो टिसर्ट लगाएका एक युवक हातमा खुकुरी लिएर झडप भइरहेको भीडतिर दौडन्छन् । हातमा रहेको त्यही धारिलो हतियारले अर्का युवकमाथि केराको थम्बा छप्काए झै छप्काउँछन् । लगत्तै हतियार प्रहार भएका युवक ढल्न पुग्छन् ।
घटना यही साउन १६ गते दिउँसो ३ बजेतिरको हो । सबै मानिस आ आफ्नै व्यस्ततामा रहेका बेला काठमाडौं ढल्कुस्थित पोडेटोल भने एकाएक रणभूमिमा परिणत भयो । केही युवाकोएउटा हुल हातमा धारिलो हतियार, रड र लाठ्ठी लिएर आफ्नै काममा व्यस्त रहेको स्थानीय पुजारी परिवारमाथि एकाएक जाइ लाग्छन् । योसँगै दुईपक्षबीच भिडन्त सुरु हुन्छ । झडपकै बीचमा धारिलो हतियार प्रहारबाट ३३ वर्षीय अमित पुजारीको ज्यान गएको छ । सिकिस्त घाइते उनलाई उपचारका लागि राष्ट्रिय ट्रमा सेन्टर लगिएकोमा उपचारको क्रममा मृत्यु भएको जिल्ला प्रहरी परिसर काठमाडौंले जनाएको छ ।उनको मृत्युपछि अहिले परिवारका सदस्य विक्षिप्त बनेका छन् ।
यस्तै, सो झडपमा माया पुजारी, दिनेश पुजारी, विक्रम पुजारी, सुविन्द्र पोडे, किरण पुजारी र अमृत पुजारीसहित ६ जना घाइते भएका छन् । उनीहरुको शिक्षण अस्पताल महाराजगञ्ज, राष्ट्रिय ट्रमा सेन्टर र पिपुल्स अस्पतालमा उपचार भइरहेको छ । घटना घटेको केही समयमै प्रहरीलाई खबर गरिएको भए पनि समयमै प्रहरी उपस्थित नहुँदा मानवीय क्षति व्यहोर्नु परेको मृतक अमितकी आमाको गुनासो छ ।अमित पुजारी परिवारको कान्छो सन्तान थिए । घटनामा घाइते भएका दुई छोरा र एक बुहारीको आईसीयुमा उपचार भइरहेको आमा किसनदेवी पुजारीले जानकारी दिइन् । उपचारमा मात्रै हालसम्म ऋण लिएर १० लाख खर्च भएको र अब उपचार गराउने पैसा नभएको भन्दै उनले दुखेसो पोखिन् ।
अमितको डेढ वर्षका मात्रै बच्चा छन् । दुधे बच्चालाई काखमा च्याप्दै अमितकी श्रीमतीले आफ्ना पतिको ज्यान लिनेहरुलाई हदैसम्मको कारबाही हुनु पर्ने माग गरिन् ।
प्रहरीका अनुसार पुरानो रिसिबीको कारण घटना घटेको हो । पोडेटोलस्थित इन्द्रेणी मन्दिरको पुनर्निर्माणको काम भइरहेको थियो । मन्दिरको रेखदेखदेखि निर्माणकार्यमा अमित र किरण पुजारी खटिएका थिए ।मन्दिरको मर्मत तथा रेखदेखमा सोमबार अमितका दाइ विक्रम र किरण खटिएका थिए । त्यही बेला निर्माणाधीन मन्दिरमा कुल्चिएको भन्दै दुई पक्षबीच विवाद भएको थियो । कुटपिट भएको आरोपमा प्रहरी वृत्त सोह्रखुट्टले एक जनालाई पक्राउ गरेर अनुसन्धान गरेको थियो ।
सोही विषयमा हाम्रो मान्छोलाई किरणले थुनाएको भन्दै अमित, विक्रम, अमृत र दिनेशले किरणलाई आरोप लगाएपछि बुधबार उनीहरुबीच विवाद भएको थियो । सोमबारको घटनाले बुधबार छिमेकी दुई समूहबीच झडपको अवस्था सिर्जना भएको प्रहरी अधिकारीको भनाइ छ । त्यसक्रममा सुविन्द्रले घरबाट खुकुरी लिएर गएको र उनले प्रहार गरेको खुकुरी लागेर अमितको ज्यान गएको पाइएको प्रहरीले जनाएको छ ।
बुधबारको घटनामा संलग्न रहेको आरोपमा प्रहरीले ७ जनालाई पक्राउ गरी अनुसन्धान गरिरहेको छ । पक्राउ पर्नेमा १९ वर्षीय सुजल देउला, ३५ वर्षीय अमृत पुजारी, ३४ वर्षीय सागर देउला, ४६ वर्षीय रवीन्द्र पोडे, २९ वर्षीया कलेनी पुजारी, ३५ वर्षीया टीकामाया पुजारी र २२ वर्षीया सञ्जाली पुजारी छन् । प्रहरीले घटनास्थलबाट एउटा खुकुरी पनि बरामद गरेको छ ।यसअघि पनि काठमाडौंको सोह्रखुट्टे, ठमेल क्षेत्रमा हतियार प्रहारका घटना हुने गरेका थिए । व्यक्तिगत रिसिबीकै कारण यी क्षेत्रमा झडप तथा ग्यांग फाइटका घटना बढेको प्रहरी अधिकारीहरुकै भनाइ छ । यसले यहाँको शान्ति सुरक्षामा समेत चुनौती बढेको देखिन्छ ।
प्रतिक्रिया