बाढी प्रभावितलाई हानपासको २ करोड सहयोग

बाढी प्रभावित नागरिकप्रति ऐक्यबद्धता जनाउँदै दक्षिण कोरियाको हानपास रेमिट्यान्सले राहत अभियान अन्तर्गत प्रारम्भिक चरणमा २ करोड कोरियन वन सहयोग गर्ने भएको छ । हानपासले यही अभियान अन्तर्गत अगस्ट २७ देखि सेप्टेम्बर ६, २०२६ सम्म हुने प्रत्येक कारोबारबापत आफ्नै तर्फबाट थप १ हजार कोरियन वन राहत कोषमा जम्मा गर्ने जनाएको छ । यसका लागि ग्राहकबाट कुनै अतिरिक्त रकम वा शुल्क लिइने छैन । हानपासका व्यवस्थापक सन्तोष खड्काको पहलमा सुरु गरिएको यो अभियानबाट संकलन हुने रकम दक्षिण कोरियास्थित नेपाली राजदूतावासको समन्वयमा प्रधानमन्त्री दैवी प्रकोप उद्धार कोषमा जम्मा गरिने बताइएको छ ।

खड्काका अनुसार २ करोड वनको सहयोग राहत अभियानको प्रारम्भिक सहयोग मात्र हो । प्रत्येक कारोबारबापत १ हजार वनका दरले थप रकम राहत कोषमा जम्मा हुने भएकाले अभियानबाट संकलन हुने कुल सहयोग रकम अझ बढ्नेछ । खड्काले हानपासमा कार्यरत नेपाली कर्मचारी तथा नेपाल टिमका तर्फबाट मात्र नभई कम्पनीमा सँगै काम गर्ने कोरियन तथा अन्य विदेशी सहकर्मीहरूलाई समेत प्रधानमन्त्री दैवी प्रकोप उद्धार कोषमा प्रत्यक्ष सहयोग गर्न आग्रह गरिएको बताए । उनका अनुसार सहयोगका लागि गरिएको आह्वानप्रति सहकर्मीहरूले पनि सकारात्मक प्रतिक्रिया दिँदै मन खोलेर सहयोग गरिरहेका छन् ।
हानपासका अनुसार अभियानमा सहभागी ग्राहकबाट राहत रकमका नाममा कुनै अतिरिक्त शुल्क लिइने छैन । ग्राहकले गर्ने कारोबारको रकम सानो होस् वा ठूलो, प्रत्येक कारोबारबापत हानपासले आफ्नै तर्फबाट १ हजार कोरियन वन राहत कोषमा जम्मा गर्नेछ । यसरी प्रारम्भिक रूपमा घोषणा गरिएको २ करोड वन र अभियान अवधिभर प्रत्येक कारोबारबाट जम्मा हुने १ हजार वनसमेत जोडिँदा दक्षिण कोरियाबाट रेमिट्यान्स कम्पनीहरूले घोषणा गरेका राहत सहयोगमध्ये हानपासको सहयोग उल्लेखनीय रूपमा ठूलो हुने अपेक्षा गरिएको छ ।