काठमाडौँ— नेकपा एमालेका उपमहासचिव प्रदीप ज्ञवालीले यसपटक प्रधानमन्त्री केपी शर्मा ओलीको चीन भ्रमणमा विगतका समझदारी कार्यान्वयनमा जोड दिने बताएका छन् ।
शनिबार बसेको पार्टीको सचिवालय बैठकको निर्णय सार्वजनिक गर्ने क्रममा पत्रकारहरुसँग कुरा गर्दै उनले भ्रमण छोटो हुने बताए ।
‘डिसेम्बर पहिलो साता हुन्छ भ्रमण, एकदम छोटो भ्रमण हुन्छ यसचोटी, दुई पक्षीय भेटघाट र वार्ता सकेर उहाँ फर्किनुहुन्छ’, उनले भने, ‘मूलत विगतमा चिनियाँ राष्ट्रपति नेपाल आउँदा भएका उच्चस्तरीय समझदारी र नेपालका राष्ट्रपतिज्यू र प्रधानमन्त्रीज्यू चीन भ्रमण गर्दा भएका समझदारी कार्यान्वयनमै हाम्रो जोड हुनेछ । त्यस अलावा स्वभाविक रुपमा दुई पक्षीय हितका विषयमा कुराकानी हुनेछ ।’
प्रधानमन्त्रीको चीन भ्रमणमा नेपालको अधिकतम हित हुने गरी समझदारीहरु हुने उनले बताए । उपमहासचिव ज्ञवालीले कांग्रेस–एमाले सम्मिलित संयन्त्र प्रधानमन्त्रीको चीन भ्रमणका लागि नबनेको बताए । ‘दुई दलबीच संवाद, सहकार्य निर्माण गर्ने उद्देश्यले संयन्त्र बनेको हो । त्यही भ्रमणका लागि बनाएको संयन्त्र होइन’, उनले भने ।
आज बसेको सचिवालय बैठकले बदलिँदो विश्व राजनीतिको बहावलाई विचार गर्दै दुबै छिमेकीसँग असल, सन्तुलित र राष्ट्रिय हितमा आधारित परराष्ट्र सम्बन्धलाई अगाडि बढाउन सुझाव दिएको छ । त्यस्तै प्रधानमन्त्रीको चीन भ्रमण राष्ट्रिय हितमा रुपान्तरित गर्न सरकारलाई सफलता प्राप्त होस् भन्ने शुभेच्छा पनि दिएको उपमहासचिव ज्ञवालीले बताए ।
प्रतिक्रिया