मृत फेला परेका दुई बालिकाकी आमा अस्मिता झापाबाट पक्राउ

काठमाडौँ— मोरङको सुन्दरहरैँचा नगरपालिका–७ स्थित केरा बगानभित्र मृत फेला परेका दुई बालिकाकी आमा अस्मिता पौडेल कार्की पक्राउ परेकी छन् ।

प्रहरीले उनलाई आज झापाबाट पक्राउ गरी विराटनगरस्थित कोसी अस्पताल भर्ना गरेको जिल्ला प्रहरी कार्यालय मोरङले जानकारी दिएको छ । दुई छोरीको विष सेवन गराई हत्या भएको आशंकामा प्रहरीले उनीसँग सोधपुछ गर्ने तयारी गरेको छ ।

जिल्ला प्रहरी कार्यालयका प्रवक्ता डीएसपी ज्ञानेन्द्रबहादुर बस्नेतले भने, “अस्वस्थ्य अवस्थामा फेला परेकाले अस्पताल भर्ना गरेका छौँ । केही सन्चो भएपछि घटनाबारे सोधपुछ र बयान लिने काम हुनेछ ।” प्रहरीका अनुसार, पक्राउ परेकी अस्मिता शारीरिक रूपमा निकै कमजोर देखिएकी छिन् । धनकुटाको पाख्रिबास नगरपालिका–४, डिकुरे घर भइ सुन्दरहरैँचा–७ मा बस्दै आएका अर्जुन कार्कीकी पत्नी दुई छोरी एक वर्षीया आइका र तीन वर्षीया अर्पणा कार्की सुन्दरहरैंचाको केराबारीमा मृत फेला परेकै दिनदेखि बेपत्ता भएकी थिइन् ।

उनीहरू स्थानीय मालती टोलमा डेरा गरी बस्दथे । नजिकै घरसमेत निर्माण गरिरहेका थिए । अर्जुनले प्रहरीसमक्ष आफ्नी पत्नीले मोबाइलमा ‘तेरा छोरी मारी दिइसकेँ, म पनि मर्छु’ भनेर म्यासेज पठाएको बयान दिएका छन् ।

घटनालाई सुक्ष्म ढंगले विश्लेषण गरी अनुसन्धान अघि बढाइएको डीएसपी बस्नेतले बताए । म्यासेजको सत्यताबारे समेत अनुसन्धान हुने प्रहरीको भनाइ छ । दुई छोरी केरा बगानमा अंगालो मारेको अवस्थामा मृत भेटिएका थिए । नजिकै विषादीको बट्टा समेत फेला परेको थियो ।नयाँ घरमा पानी हाल्ने विषयमा विवाद भएपछि पाँच दिनअघि अस्मिता दुई छोरी लिएर घरबाट हिँडेको थिइन् । पछि केरा बगानमा छोरीहरू मृत फेला परेका थिए । अर्जुन र अस्मिताबीच २०५९ सालमा विवाह भएको थियो ।