अन्ततः शेख हसिनाको हार, १५ वर्षीय सत्ता ढल्यो, देश छोडेर भागिन्

बंगलादेशमा आरक्षण कोटाविरुद्ध चर्किएको विद्यार्थी आन्दोलनले राजनीतिक रङ्ग लिएसँगै प्रधानमन्त्री शेख हसिनाले पदबाट राजीनामा दिएर देश छाडेकी छन् ।

सन् २००९ देखि लगातार बंगलादेशको सत्तामा रहेकी हसिनाविरुद्ध चर्किएको आन्दोलनले हिसांत्मक रुप लिँदै गएपछि उनले आज पदबाट राजीनामा दिएकी हुन् । राजीनामा लगत्तै उनी सेनाको जहाजमार्फत भारत उडेकी छन् ।

उनी भारतको राजधानी दिल्ली पुग्ने र त्यहाँबाट लन्डन प्रस्थान गर्न सक्ने भारतीय सञ्चारमाध्यमहरुले जनाएका छन् । त्यसपछि उनी फिनल्यान्ड वा अरु कुनै देश जान सक्ने आकलन भइरहे पनि यसबारे निश्चित हुन सकेको छैन । हसिनाले राजीनामा दिएर देश छाडेलगत्तै बंगलोदेशका सेना प्रमुख जनरल वकार उज जमानले अब सेनाले अन्तरिम सरकार बनाउने घोषणा गरेका छन् । यस्तै, पछिल्लो विकसित घटनाक्रमकै कारण बंगलादेशको राजधानी ढाकास्थित अन्तर्राष्ट्रिय विमानस्थल ६ घण्टाका लागि बन्द भएको छ । हसिनाले राजीनामा दिएपछि धेरै मानिसहरु विमानस्थलमा जान थालेपछि सेनाले बन्द गर्ने सूचना जारी गरेको हो ।

बंगलादेशमा गत महिनादेखि आरक्षण कोटाविरुद्ध आन्दोलन चर्किदै आएको थियो । तर प्रधानमन्त्री हसिनाले आन्दोलनमा उठेका माग सम्बोधन गर्न चासो देखाएकी थिइनन् । १७ करोड जनसङ्ख्या भएको बंगलादेशमा पछिल्ला केही दिनमा भएका प्रदर्शनले हिंसात्मक रुप लिँदा हालसम्म ३ सय जनाभन्दा बढीको ज्यान गइसकेको छ ।

पछिल्लो दुई दिनमा मात्रै एक सय जनाको मृत्यु भएको छ । विद्यार्थीहरुले सुरु गरेको आन्दोलनले देशव्यापी रुप लिएसँगै राजनीतिक अस्थिरताको कारक बनेको छ । विश्वविद्यालय र कलेजका विद्यार्थीहरूले गरेको आन्दोलनले देशभरि नै अशान्ति, रक्तपात र अराजकता निम्त्याएको छ ।

सरकार विरोधी प्रदर्शनमा उत्रिएका आन्दोलनकारीले राजधानी ढाकास्थित प्रधानमन्त्रीको सरकारी निवासमा लुटपाट र तोडफोड गरेका छन् । उनीहरुले कुर्सी र सोफा बोकेर दौडिएको भिडियो फुटेजमा देखिएका छन् । सरकारविरोधी आन्दोलनमा प्रदर्शनकारीले अराजकता पनि देखाएका छन् ।

आइतबार विरोध प्रदर्शन उग्र भएको थियो । सोमबार पनि ठूलो संख्यामा प्रदर्शनकारी सडकमा उत्रिएका थिए । प्रधानमन्त्रीको सरकारी निवास कब्जा गर्ने उद्देश्यसहित प्रदर्शनकारी अगाडि बढेपछि असुरक्षित महसुस गरेकी हसिनासहित परिवारका सदस्यहरुले गणभवन छाडेका थिए । प्रधानमन्त्री निवास कब्जा गरेका प्रदर्शनकारीले विजय उत्सव नै मनाइरहेका छन् । राजीनामा दिएर हसिनाले देश छाडेसँगै सेना प्रमुखले अन्तरिम सरकार बनाउने तयारी भइरहेको घोषणा गरेका छन् । हसिनाले प्रधानमन्त्री पदबाट राजीनामा दिएको पुष्टि गर्दै सेना प्रमुख वाकर उज जमानले देशबासीको नाममा सम्बोधन गर्दै अहिलेको अवस्थाको सारा जिम्मेवारी आफूले लिएको बताएका छन् । देशले निकै कष्ट भोगिसकेको, अर्थतन्त्र मारमा परेको र कयौँको ज्यान गइसकेकाले हिंसा अहिले नै रोक्नु पर्नेमा उनले जोड दिएका छन् । उनले आफूले देशका विपक्षी राजनीतिक दलहरूसँग कुरा गरिसकेको भन्दै छिट्टै एउटा “समाधान निस्किने“ अपेक्षा गरेको बताएका छन् । यद्यपि बंगलादेशको अन्तरिम सरकारको नेतृत्व गर्छन् भन्ने स्पष्ट हुन बाँकी छ । विगत १६ वर्षदेखि लगातार बाङ्ग्लादेशको सत्ता हाँकेकी हसिनाले अन्ततः देश छाडेर विदेशमा शरण लिनु पर्ने अवस्था आएको छ । आन्दोलनमार्फत हसिनाको एकछत्र शासन सत्ता पल्टाएका प्रदर्शनकारीले अन्तरिम सरकार र त्यसपछिको राजनीतिक परिस्थितिलाई कसरी लिन्छन् ? साथै अशान्ति र अस्थिरता छाएको बंगलादेशमा कसरी राजनीतिक स्थायित्व कायम हुन्छ ? भन्ने विषय निकट भविष्यले निर्धारण गर्ने देखिन्छ ।