काठमाडौँ— हिन्दु पञ्जांगमा आधारित नेपालको राष्ट्रिय पात्रो विक्रम सम्वत २०८० लाई बिदा गर्दै आज मध्यरातिदेखि नयाँ वर्ष २०८१ मा प्रवेश हुँदैछ । नयाँ वर्षमा प्रवेश गर्दै गर्दा पुराना कुरालाई बिर्सदै नयाँ जोशका साथ नयाँ कार्यको थालनी तथा नयाँ अठोट लिने गरिन्छ । यसरी नयाँ संकल्प लिँदै गर्दा अधिकांश व्यक्तिहरुले ज्योतिष शास्त्रलाई पनि विश्वास गर्ने गर्दछन् । नयाँ वर्ष २०८१ साल ज्योतिष शास्त्रअनुसार कस्तो रहँला ?
व्यक्तिगत, पारिवारिक, सामाजिक रुपमा मात्र नभई राजनीतिक रुपमासमेत नयाँ वर्ष कस्तो रहला ? न्योतिष शास्त्रअनुसार आफ्नो ग्रह दश, भविष्य फलमा धेरैको चासो रहने गर्छ । हरेक वर्ष नेपाल पञ्चाङ्ग निर्णायक समितिको स्वीकृतिमा पात्रोहरु प्रकाशन हुने गर्दछन् । यसरी प्रकाशित हुने पात्रोअनुसार पनि ज्योतिष भविष्यवाणी गर्ने गरिन्छ । ज्योतिष शास्त्रका ज्ञाताहरुले भविष्यवाणी गर्ने गर्दछन् । यसमा हरेक व्यक्तिको चासो रहने गर्दछ । नयाँ वर्ष २०८१ लाई लिएर पन्डित तथा ज्योतिषहरुले विभिन्न कोणबाट भविष्यवाणी गरेका छन् । नयाँ वर्ष २०८१ साल कालयुक्त नामको संवत्सर रहेको उनीहरुले बताएका छन् ।
साथै २०८१ सालमा राजा मङ्गल ग्रह र मन्त्री शनि ग्रह रहेको ज्योतिष शास्त्रले देखाएको छ । मंगल र शनिको संयोजन आफैँमा शुभ मानिदैन । संक्रान्ति शनिबार परेकाले पनि महामारी देखा पर्ने, अशुभ फलदायी सङ्क्रान्तिको बारका कारण उत्पादित सबै वस्तुहरूको नोक्सानी बढ्ने तथा शनि र मंगल बलियो बन्द यो वर्ष द्वन्द्व बढ्ने ज्योतिष शास्त्रीहरुले बताएका छन् । यही ग्रह गोचरणीय प्रभावले आगलागी, दुर्घटना बढ्ने, वैवाहिक सम्बन्धहरु छुटिनेलगायतका घटना बढ्ने जनाइएको छ ।
२०८१ मा राजनीतिक क्षेत्रमा उतारचढावको स्थिति देखा पर्नेछ । राजनीतिक क्षेत्रमा विश्वासको सङ्कट देखा पर्ने जनाइएको छ । खाद्यान्नको मूल्य सामान्य रहने र फलफूल तथा तरकारीको मूल्य अत्यधिक वृद्धि हुने ज्योतिष शास्त्रका जानकार बताउँछन् । नयाँ वर्षको भविष्यवाणी औसत रहे पनि साम्प्रदायिक तनाव केही स्थानमा देखा पर्नेछ । पश्चिमी क्षेत्रमा अशान्ति बढ्नेछ । साथै तापमान बढ्नाले जनजीवन कष्टदायी रहने देखिएको छ । पशुचौपायामा रोगका कारण हानी पुग्नेछ । आँधीहुरी र अग्निभय बढ्ने पनि ज्योतिष शास्त्रीहरुको भविष्यवाणी छ । हुरी बताससहितको वर्षाले पनि केही स्थानमा क्षति पुग्ने सम्भावना छ ।
प्रतिक्रिया