काठमाडौँ— बागमती प्रदेशमा नेकपा एमालेबाट नियुक्त भएका चार जना मन्त्रीले पद तथा गोपनीयताको शपथ लिएका छन् ।
प्रदेश प्रमुख यादवचन्द्र शर्माले आज एमालेबाट मन्त्री बनेका काठमाडौंका केशव पोखरेल र प्रकाश श्रेष्ठ, ललितपुरका रामेश्वर श्रेष्ठ, मकवानपुरका एकालाल श्रेष्ठलाई पद तथा गोपनीयताको शपथ गराए ।
प्रकाश श्रेष्ठले उद्योग, वाणिज्य, भूमि तथा प्रशासन, पोखरेलले वन तथा वातावरण, एकालाल श्रेष्ठले खानेपानी, ऊर्जा तथा सिँचाईं र रामेश्वर श्रेष्ठले स्वास्थ्य मन्त्रालयको जिम्मेवारी पाएका छन् । प्रकाशबाहेक अरु तीन जना गत २५ पुसमा शालिकराम जम्कट्टेल मन्त्रिपरिषदकै मन्त्री हुन् ।
रामेश्वर यसअघि पनि स्वास्थ्य मन्त्रालय थिए । पोखरेल कृषि तथा पशुपन्छी विकास मन्त्री र एकालाल श्रम, रोजगार तथा यातायात मन्त्री थिए । एमाले दुई महिना सरकारमा बसेर १० चैत ०७९ मा बाहिरिएको थियो ।
एमालेबाट संसदीय दलका नेता जगन्नाथ थपलिया यसअघि नै आर्थिक मामिला तथा योजनामन्त्री बनिसकेका छन् ।
चार जना मन्त्रीमध्ये केशव र प्रकाश दोस्रो पटक प्रदेशसभा सदस्य निर्वाचित भएका हुन् भने रामेश्वर र एकालाल पहिलो पटक प्रदेशसभामा पुगेका हुन् ।
नेपाली कांग्रेसले छोडेको ६ वटा मन्त्रालयमा एमालेले ५ वटा मन्त्रालय लिएको छ । संस्कृति, पर्यटन तथा सहकारी मन्त्रालयमा हाम्रो नेपाली पार्टीका शैलेन्द्रमान बज्राचार्य १५ चैतमा नियुक्त भएपछि बाँकी मन्त्रालयमा एमालेले दाबी गरेको थियो ।
नेकपा (एकीकृत समाजवादी)बाट आज बिहान रमा आले मगरको भने मन्त्रालय तोकिएको छैन । एकीकृत समाजवादीले कांग्रेसले छाडेकामध्ये एउटा आफूहरुले पाउनुपर्ने माग गरेको थियो ।
मन्त्रिपरिषदमा यसअघि नै एकीकृत समाजवादीबाट श्रम, रोजगार तथा यातायात मन्त्रालय र कृषि तथा पशुपन्छी विकास मन्त्री छन् ।
भागबण्डामा विवाद उत्पन्न भएपछि मुख्यमन्त्री कार्यालयमा मंगलबार दिउँसो मुख्यमन्त्री जम्कट्टेल, एमाले नेता थपलिया, एकीकृत समाजवादीका नेता कृष्णप्रसाद शर्मा खनालबीच छलफल भएको थियो । छलफलमा सहमति जुटेपछि चार मन्त्रीले शपथ लिएका हुन् ।
प्रतिक्रिया