काठमाडौँ— लामो समय स्थगित भएर आइतबार बसेको संसद बैठकमा सांसदहरुले समसामयीक विषयका साथै प्रमुख प्रतिपक्षी नेपाली कांग्रेसले गृहमन्त्री रवि लामिछानेको राजीनामा मागलाई निरन्तरता दियो । कांग्रेसले गृहमन्त्री लामिछाने सहकारी ठगी प्रकरणमा मुछिएकाले संसदीय छानबिनका लागि पनि आवाज उठायो ।सभामुख देवराज घिमिरेको ८ दिने विदेश भ्रमणकै कारण लामो समय स्थगित बैठक आइतबार बसेको हो ।
१० दिनपछि बसेको प्रतिनिधि सभा बैठकमा आइतबार सांसदहरुले समसामयीक विषय उठाएका छन् । सभामुख देवराज घिमिरेसहित शीर्ष राजनीतिक दलका प्रमुख सचेतकहरू आठ दिने जेनेभा भ्रमणमा गएका थिए । बजेट निर्माण र विधेयकहरूमाथि छलफल जारी रहेका बेला बैठक स्थगित हुँदा ‘बिजिनेस’ प्रभावित भएकोे सांसदहरूले गुनासो गरे । आइतबारको संसद बैठकमा प्रमुख प्रतिपक्ष दल नेपाली कांग्रेसले गृहमन्त्री रवि लामिछानेको राजीनामा माग कायमै राख्यो । सहकारी ठगी प्रकरणमा नाम मुछिएका गृहमन्त्री लामिछानेमाथि छानविन गर्न संसदीय छानबिन समिति बनाउन सांसद सञ्जयकुमार गौतम माग गरे । उनले प्रधानमन्त्रीले ठूला माछालाई काखीमा च्यापेर सानो माछा खोजेको आरोपसमेत लगाए ।
सत्तारुढ नेकपा (एमाले) का सांसद एवं पूर्वमन्त्री रघुजी पन्तले नेपालमा भारतीय मालबाहक ट्रकमाथि तत्काल निगरानी राख्न सरकारसँग माग गरे । उनले नेपालको ट्रक उद्योगनै बन्द हुने अवस्थामा पुग्दा पनि सरकारले भारतीय ट्रकलाई नेपालमा निर्वाध रुपमा सञ्चालन हुने कुरामा रोकावट नगरेको भन्दै आक्रोश व्यक्त गरे ।
राष्ट्रिय स्वतन्त्र पार्टीकी सांसद डा. तोसिमा कार्कीले वीर अस्पतालमा तत्काल स्वास्थ्यकर्मीहरु नियुक्त गर्न माग गरिन् । बैठकको विशेष समयमा बोल्दै सांसद कार्कीले वीर अस्पतालमा स्वास्थ्यकर्मीको अभावमा सेवा प्रवाहमा समस्या भइरहेको भन्दै तत्काल स्वास्थ्यकर्मी नियुक्त गर्न माग गरेकी हुन् । अघिल्लो स्वास्थ्यमन्त्रीले एकैपटक २७६ जना स्वास्थ्यकर्मीलाई वीर अस्पतालबाट निकालेर अस्पतालको सेवा नै अलपत्र पारेको उनले गुनासो गरिन् ।
यता स्वतन्त्र सांसद अमरेशकुमार सिंहले न्यायाधीशहरुको आचरण छानविन गर्न संसदीय छानविन समिति गठन गर्न माग गरे । न्यायपालिकाको निर्णय प्रक्रिया कानूनसम्मत र संविधानसम्मत हुनुपर्ने उनको भनाइ छ ।
प्रतिनिधिसभाका सांसदहरुले समसामयीक विषयमा सभामुखको ध्यानाकर्षण गराए । दुर्गम क्षेत्रका जनताले नुन नपाएको पनि केही सांसदले गुनासो गरेका थिए ।
प्रतिक्रिया