काठमाडौँ— सरकारले पछिल्लो समय चालेका साहसिक कामका कारण जनतामा केही आश जागेको प्रधानमन्त्री पुष्पकमल दाहाल प्रचण्डले बताएका छन् । तर, हुटहुटीमाथि हुटहुटी मात्रै थप्ने प्रचण्डले कार्यशैली भने फेर्न सकेका छैनन् । सत्ता र प्रतिपक्षी दुवैले प्रचण्ड सरकारबाट केही आशा गर्नै नसक्ने निष्कर्ष निकालिरहँदा प्रचण्ड भने आफैँ आत्मरतिमा रमाइरहेका छन् ।
प्रधानमन्त्री पुष्पकमल दाहाल प्रचण्डले गत पुस १० गते आफ्नो तेस्रो कार्यकालको वर्ष दिन पुगेको उपलक्ष्यमा आत्मसमीक्षा गर्दै अबको एक महिनामा नै सरकारले केही गरेको संकेत देखिने घोषणा गरेका थिए । बितेको एक वर्षमा सोचेअनुसारको काम गर्न नसकेको स्वीकारेका प्रचण्डले अबदेखि नयाँ ढंगले काम गर्ने र मन्त्रीदेखि प्रशासनिक सबै निकायलाई सही ट्रयाकमा ल्याउने प्रतिबद्धता जनाएका थिए । मन्त्री र कर्मचारीलाई मात्रै नभई आफू पनि राजधानी बाहिर जानु परेको अवस्थामा वा अत्यन्त जरुरी अन्य कुनै काम परेकोबाहेक हरेक दिन १० बजे नै सिंहदरबार पुगेर काम गर्ने योजना सुनाएका थिए ।
तर, उनले त्यो योजना एक दिनभन्दा बढी कार्यान्वयन गर्न त सकेनन् नै साना तिना कार्यक्रममा गएर समय खेर नफाल्ने र उद्घाटनमा नजाने उद्घोष गरेको बाचाबाट पनि विमुख हुँदै गएका छन् । आफ्नो इच्छाशक्ति र हुटहुटीमा मन्त्रीदेखि कर्मचारीसम्म बाधक देख्ने उनले पटक पटक बोली फेरे पनि कार्यशैली भने फेर्न सकेका छैनन् । यसका बाबजुद उद्घाटन र समारोहमा रिबन काट्ने उनको दैनिकीमात्रै बनेन कि चार गुणासम्म बढ्यो । माघ १ गते एकैदिन उनले चार कार्यक्रममा सहभागिता जनाएका थिए । यद्यपि अब एक महिनाभित्रै सुध्रिने बाचा गरेका प्रचण्डले रिबन काट्न त छोडेका छैनन् । बरु उनी अहिलेको सरकारले इतिहासले सम्झिने गरि जनपक्षीय काम भएको दाबी गरिरहेका छन् । बुधबारमात्रै पनि एउटा कार्यक्रमलाई सम्बोधन गर्दै आफ्नो सरकारले गरेको साहसिक कामका कारण अब चाहि केही हुन्छ भत्रे आशा जनतामा पलाएको भन्दै आफ्नै प्रशंसामा रमाए ।
प्रचण्डले वर्ष दिनदेखि सम्भावना देख्ने र गल्ती सुधार्नु पर्ने महसुस मात्रै गरिरहेका छन् । उनले भनेको जस्तै नक्कली भुटानी शरणार्थी, ललिता निवास, सुन प्रकरण र एनसेलको फाइल त खुलेको छ । तर कसको दबाबमा कहाँ गएर अड्किएको छ आम नागरिकलाई अत्तोपत्तो छैन । अरुलाई गाली गरेकै भरमा जनताको निराशा नचिरिने भन्दै प्रतिपक्षी एमाले अध्यक्ष केपी शर्मा ओलीको प्रचण्डप्रतिको कटाक्ष निरन्तर छ । अहिलेको सरकार न जनताको हुन सकेको छ न त राष्ट्रको भन्ने एमालेको ठम्याई छ । वर्तमान सरकारसँग राष्ट्रिय हितको नेतृत्व गर्ने सामथ्र्य नै नभएको प्रमुख प्रतिपक्षीको निष्कर्ष छ ।
सरकारको विरोध गर्नु प्रतिपक्षीको धर्म नै भए पनि सत्तामा सामेल दलका नेता पनि सरकारको कामप्रति सन्तुष्ट छैनन् । सरकारले राम्रो काम गरेको भत्रे आत्मरतिमा प्रचण्ड रमाइरहँदा उनीबाट केही आशा गर्नै नसकिने सत्ता पक्षका नेताहरू नै बताइरहेका छन् । आफ्नै लक्ष्य भेटाउन नसकेका प्रचण्डले सरकारमा बसेर समय खेर फालिरहेको नेपाली कांग्रेसका नेताको टिप्पणी छ ।
भ्रष्टाचारीलाई कुनै टार र कोटले छेक्न नसक्ने भन्दै गर्जिए पनि विस्तारै टार हाबी हुँदै जाँदा सुन काण्डलाई थामथुम पारिएको छ । प्रचण्डको दुर्बल पक्षमध्ये अग्रणी स्थानमा आउने नातावादका कारण पुत्री गंगा दाहालको नाम मुछिएको एनसेल काण्ड पनि विगतकै छानविन समिति भन्दामाथि उठ्न सकेन । प्रचण्ड एक्लैले ठूलै उपलब्धि हासिल गरेजस्तो चर्चा भइरहँदा उनी बाहेकका सत्ता पक्षकै दल, प्रतिपक्ष र आम नागरिकले भने उलटपुलट हुने गरी काम भएको महसुस गर्न सकेका छैनन् ।
प्रतिक्रिया