दुर्गाको मानव सागर देखेर गणतन्त्रवादीको सातो गयो, घरघरमै राजावादी बन्धक, पञ्चायतको झल्को

काठमाडौँ —दुर्गा प्रसाईंको अभियानबाट राजतन्त्र फर्किन्छ भन्ने विश्वास स्वयम् ज्ञानेन्द्र शाहलाई नै विश्वास नभएको अवस्थामा प्रचण्ड सरकारको भने होस हवास उडेको छ । यसअघि पनि व्यवस्थाविरुद्ध प्रदर्शन र विरोध हुँदै आए पनि प्रसाईंसँग मात्रै राज्य किन यति धेरै डराइरहेको छ ? प्रश्न स्वभाविक मान्न सकिने खालेको छैन । आफूलाई लोकतान्त्रिक दाबी गर्ने प्रचण्ड सरकारले नै अधिनायकवादी र सर्वसत्तावादी चरित्र देखाउन सुरु गरेको छ ।

गणतन्त्रका विरोधी एक विवादित अभियन्ता दुर्गा प्रसाईंको डरले राज्य सञ्चालकको निद हराम हुँदा उनैको सुरक्षार्थ भन्दै सरकार प्रसाईंलाई ‘होम एरेस्ट’ गर्न बाध्य बनेको छ । राजालाई फाले पनि राजाको प्रवृत्ति आत्मसात गरेका गणतन्त्रवादीले दुर्गादेखि डराएर लोकतन्त्रमा विरोध र प्रदर्शन गर्ने हकसम्म खोसिरिहेको छ । सडकमा हिँड्डुल गर्नेदेखि होटेलमा बास बस्ने आम सर्वसाधारणसम्म सबैलाई धरपकड गरिरहेको सरकार आफँैले नेतृत्व गरेको लोकतन्त्रकै उपहासमा उत्रिएको छ । राजालाई निरंकुश देख्ने गणतन्त्रवादी नै अहिले ज्यादतीपूर्ण व्यवहार देखाइरहेका छन् ।

प्रधानमन्त्री प्रचण्डले केही दिन अघि बोलेको कुरो आज पुष्टि गरिदिएका छन् । जनतालाई शान्ति सुरक्षाको अनुभूति गराउनु पर्ने प्रहरी प्रशासन नै त्रसिद बनाउन तल्लिन छ । प्रसार्इंको एजेण्डा राजनीतिक वा राजतन्त्रवादी मात्रै पनि छैन । पूर्वराजा ज्ञानेन्द्रलाई नै प्रसाईंले राजतन्त्र फर्काउँछन् भन्ने विश्वास नभइरहेको बेला गणतन्त्रवादी भने प्रसाईंको अभियानले आजको भोलि नै राजा आउने पीरमा देखिन्छन् । जसका कारण प्रचण्ड सरकार चुप बस्न नहुने भन्दै अझै बढी दबाउनु पर्ने तर्क गर्न थालेको छ ।

आफैँले अराजकको संज्ञा दिएका प्रसाईंसँग भिड्न राज्यले ठूलै लगानी गरिरहेको छ । साम–दाम–दण्ड–भेद सबै उपाय अपनाएको सरकार ढाका टोपी, दौरा सुरुवाल र राष्ट्रिय झण्डा बोकेकासँग नै तर्सिन थालेको छ । प्रदर्शन र विरोध त अरुले पनि गरेका छन् तर, प्रसाईंसँग त्यस्तो के अभूत शक्ति छ र जसले गर्दा गणतन्त्रवादीहरू पानीबिनाको माछो जस्तै छटपटाउन थालेका हुन् ।

बिहीबार प्रसाईंको आह्वानमा उत्रिएका व्यवस्था विरोधी जनसागरले सत्तामा बस्नेको खुट्टा कामेको हो कि ? भन्ने जिज्ञासा पैदा गरेको छ । साथै गणतन्त्रण विरोधीहरुको प्रदर्शनमा भएको हस्तक्षेपले सरकार निर्मम् ढंगले अघि बढ्न खोजको कुरा पानी जस्तै छर्लङ्ग भएको छ । गणतन्त्रवादीहरूमा प्रसाईंको डर यतिसम्म पैदा भएको छ कि राजावादीहरू सडकमा आउँदा पनि अनुमति लिने पर्ने अवस्था आएको छ ।

गणतन्त्रको पक्षपोषण गर्नेहरू नै निरंकुश भइदिँदा राजावादीहरूमा यसले थप आक्रोश उत्पन्न भएको छ । मसान घाटमा पुगिसकेको राजतन्त्र फर्किने कुनै सम्भावना नै नरहेको र यो दिवास्वप्न मात्रै भएको भन्ने गणतन्त्रवादीहरू मामुली एक अभियन्ताको अभियानबाट किन यति धेरै भयभित भइरहेका छन् ? त्यो भने आश्चर्यजनक छ ।