हमासले इजरायलमा गरेको आक्रमणमा परी कम्तिमा १० नेपालीको मृत्यु भएको पुष्टि

काठमाडौँ– प्यालेस्टायनी कट्टरपन्थी समूह हमासले इजरायलमा गरेको आक्रमणमा परी कम्तिमा १० नेपालीको मृत्यु भएको पुष्टि भएको छ । इजरायलस्थित नेपाली राजदूत कान्ता रिजालका अनुसार तीन जना घाइते भएका छन् । मृत्यु हुनेमा घोडाघोडी–४ कैलालीका नारायण न्यौपाने, जयपृथ्वी–६ बझाङका गणेशकुमार नेपाली, बाउनिया–३ कैलालीका आशिष चौधरी, लेकाम–५ दार्चुलाका दिपेशराज विष्ट, सपही–६, धनुषाका आनन्द साह र मधुवान–१, सुनसरीका राजेशकुमार स्वर्णकार छन् । यस्तै पाँचनली–डोटीका राजन फुलारा, लामिखाल–८ डोटीका पदम थापा, सारदा–३ सल्यानका प्रवेश भण्डारी र मालिकार्जुन–४ दार्चुलाका लोकेन्द्र सिंह धामीको पनि मृत्यु भएको छ । सारदा–२ सल्यानका विधान सेजुवाल, दगिशरण–३ दाङका प्रविण डाँगी घाइते भएका छन् । उनीहरुको स्थानीय अस्पतालमा उपचार भइरहेको छ । दुबैको खट्टामा गम्भीर चोट लागेको छ । फसेका नेपालीको तत्काल उद्धारका लागि पहल गर्न सांसदहरुले दबाब दिएका छन् । आक्रमणमा हालसम्म ६ सय बढी इजरायली मारिएका छन् ।।