सोलुखुम्बुका ट्रेकिङ गाईड शेर्पा लार्के पास क्षेत्रमा ५ दिनदेखि बेपत्ता

काठमाडौँ— सोलुखुम्बुको खुम्बु पासाङ ल्हामु गाउँपालिका १ बुक्साका एक ट्रेकिङ गाईड गोरखाको लार्के पास क्षेत्रमा बेपत्ता हुनुभएको छ ।

खुम्बु सांग्रिला ट्रक एण्ड एक्सपेडिसन प्रालिबाट पदयात्रामा निस्किनुभएका ३९ वर्षीय फुछेत्तर शेर्पा ५ दिनदेखि बेपत्ता भएको उहाँका भेना फुनुरु शेर्पाले जानकारी दिनुभयो । २ जना विदेशी नागरिक र भरिया सकुशल फर्किए पनि शेर्पा भने अहिलेसम्म नफकिएको बताइएको छ ।

सो क्षेत्रमा हिमपात भइरहेकाले वेपत्ताको खोजीमा समस्या भएको गोरखाका प्रहरी प्रमुख तथा प्रहरी नायव उपरीक्षक केदार खनालले बताउँनुभयो । उहाँको खोजीका लागी सिम्रिक एगर र एभेष्टर एयरको हेलीकप्टर तयारी अवस्थामा भएपनि मौसम प्रतिकुलताका कारण लार्के पास क्षेत्रमा जान नसकेको उहाँले बताउँनुभयो ।

यता शेर्पाको परिवारले भने सरकारी निकायबाट सहयोग नपाएको गुनासो गरेका छन ।