आज साउन महिनाको दोस्रो सोमबार,शिवालयहरुमा जल चढाउने र पूजा गर्नेहरुको घुइँचो

काठमाडौँ — आज साउन महिनाको दोस्रो सोमबार, पशुपतिसहित देशभका शिवालयहरुमा जल चढाउने र पूजा गर्नेहरुको घुइँचो लागेको छ । पहेँलो बस्त्र धारण गरेका बोलबम तीर्थयात्रीहरु खालि खुट्टा पैदल पशुपतिनाथ मन्दिरलगायत मुलुकभरका शिवालयमा जल चढाउन आएका छन् ।

साउन महिनाको सोमबार शिवको पवित्र बार हुने भन्दै शुद्ध जल र दूध चढाएर पूजा गर्ने चलन छ । हरेक साउन महिनाको सोमबार दान, स्नानसहित शिवको पूजा गर्नाले पाप नष्ट हुने, परिवारका सदस्यको दिर्घायू हुने र सुख शान्ति मिल्ने धार्मिक विश्वास छ ।