सुदूरपश्चिम प्रदेशमा बजेट विवाद,प्रदेश सभा सदस्यहरुले गरे बैठक बहिस्कार

काठमाडौँ — सुदूरपश्चिम प्रदेश सरकारले प्रस्तुत गरेको आगामी आर्थिक वर्ष २०७९र०८० को बजेटमाथि छलफल गर्न बोलाइएको संसद बैठक प्रतिपक्षी दलका प्रदेश सभा सदस्यहरुले बहिस्कार गरेका छन्। प्रतिपक्ष नेकपा एमाले, लोसपा र जसपा सांसद प्रदेश सभा बैठकमा उपस्थित नभएपछि सोमबार दिउँसो ३ बजेका लागि बोलाइएको बैठक पनि फेरि स्थगित भएको छ। बैठकमा सत्ता पक्षकै सांसदको उपस्थिती पनि न्यून देखिएको छ।

प्रतिपक्ष दलको सिट खालि भएको भन्दै सभामुख अर्जुन बहादुर थापाले भोलि बिहान ११ बजेसम्मका लागि बैठक स्थगित गरेका छन्। सत्ता नेतृत्वकर्ता नेकपा माओवादी केन्द्र र सत्ता साझेदार नेकपा एकीकृत समाजवादीका सांसदहरु बजेटको पक्ष र विपक्षमा उभिएका छन्। बजेटमा विधि र प्रक्रिया विपरीत मनपरी ढंगले योजना समावेश गरिएको भन्दै सत्तारुढ दलका केही सांसददेखि मन्त्रीले बजेट संशोधनको अडान राखेका छन्। सत्तापक्षको एक कित्ता भने यथास्थितिमै बजेट पास गर्ने रणनीतिमा छ। यही विषयमा सहमति नजुट्दा बजेट संसदमा प्रस्तुत भएको एक महिना बित्नै लाग्दा समेत बजेटमाथि छलफल अगाडि बढ्न सकेको छैन।