रुसमाथि प्रतिबन्ध लगाउने सिंगापुरको घोषणा

काठमाडौँ — युक्रेनमाथि गरेको आक्रमणको विषयलाई लिएर सिंगापुरले रुसमाथि प्रतिबन्धको घोषणा गरेको छ । सिंगापुरले रुसबाट हुने आयात सीमित पार्ने र केही रुसी बैंकमाथि पनि प्रतिबन्ध लगाउने निर्णय गरेको हो ।

त्यसका साथै सिंगापुरले रुससँगको भर्चुअल मुद्रा क्रिप्टोकरेन्सी कारोबार र रुसको केन्द्रीय बैंकलाई सहयोग गर्न सक्ने सबै वित्तीय संस्थानहरुलाई प्रतिबन्ध लगाउने निर्णय गरेको हो ।

सिंगापुरका विदेशमन्त्री भिभियन कालाकृष्णनले यसअघि संसदमा बोल्दै सिंगापुरको लक्ष्य उचित प्रतिबन्ध लगाउने धेरै समान विचार भएका मुलुकसँग मिलेर काम गर्नु रहेको बताएका थिए । सिंगापुर क्षेत्रीय छिमेकी मुलुकमा रुसमाथि प्रतिबन्धको घोषणा गर्ने पहिलो मुलुक हो ।

यद्यपि दक्षिण पूर्वी एसियाली मुलुकको संगठन (आसियन) का केही मुलुकले रुसको कदमको निन्दा गरेका छन् ।