सडकमा बालेनका नयाँ नियम, पैसा असुल्ने ट्राफिकको दाउ, चौतर्फी विरोध, ज्ञानेन्द्रले छेडे बहस (भिडियोसहित)

काठमाडौं– वर्षौं पुरानो साउथ इन्डियन ब्लकबस्टर फिल्म ‘सिएम भरत’ मा एउटा दृश्य छ, जहाँ भरत प्रदेशको मुख्यमन्त्री भएको केही समयमै शहरको ट्राफिक व्यवस्थापनका लागि तोकिएको जरिवानालाई एकै पटक १० गुणाले बढाइन्छ । ठीक त्यही दृश्यको झल्को दिने गरी नेपाल सरकारले पनि ट्राफिक नियम उल्लंघनमा निर्ममता देखाउने भएको छ । सरकारले तयार पारेको ‘सवारी तथा यातायातको सम्बन्धमा व्यवस्था गर्न बनेको विधेयक, २०८१’ पारित भएमा ट्राफिक नियम उल्लंघन गर्ने जो–कोहीले अहिलेको भन्दा दोब्बर–तेब्बर बढी जरिवाना तिर्नुपर्ने हुन्छ ।
वर्षौँदेखि काठमाडौँ लगायत देशका मुख्य शहरहरूमा बढ्दै गएको सवारी चाप र ट्राफिक नियम उल्लंघनका घटनाले शहरी व्यवस्थापनमाथि प्रश्न उठाउँदै आएका छन् । यसैका लागि पहिलेका सरकारले तयार पारेको ट्राफिक नियम उल्लंघन गर्नेविरुद्ध कसुर अनुसार जरिवाना हुने गरी सवारी तथा यातायात व्यवस्था ऐन विधेयकमाथि अहिले पूर्वाधार विकास मन्त्रालयले छलफल अघि बढाएको छ । विधेयकमा कसुर अनुसार फरक–फरक परिमाणमा जरिवाना लिने व्यवस्था गरिएको छ । तर, सरकारले उक्त विधेयक पारित गरी कार्यान्वयनमा ल्याउनु अगावै यो चर्चा र विवादमा तानिएको छ । नियम उल्लंघन गर्नेविरुद्ध तोकिएको चर्को जरिवाना रकमको विषयले संसदमा समेत प्रवेश पाएको छ । राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानेन्द्र शाहीले यदि आम नागरिकले नियम उल्लंघन गरेबापत १ लाख रुपैयाँसम्म जरिवाना तिर्नुपर्छ भने सरकारले पनि आफ्ना गल्तीमा जरिवाना तिर्नुपर्ने प्रस्ताव गरेका छन् ।