ग्यास हाहाकारका चार कारण, नयाँ मन्त्रीको नयाँ खाका, उपभोक्तादेखि व्यापारीसम्मलाई नयाँ नियम (भिडियोसहित)

काठमाडौं– पछिल्ला केही महिनायता नेपालमा खाना पकाउने एलपी ग्यासको चरम अभावका कारण जनजीवन नै अस्तव्यस्त बनिरहेको छ । नागरिकहरू खाली सिलिन्डर बोकेर सडकमा भौँतारिन बाध्य छन् । एक सिलिन्डर ग्यासकै लागि हप्तौंसम्म लाइनमा बस्नुपर्ने बाध्यताले सरकारप्रति नागरिकको आक्रोश चुलिँदै गएको छ । बजारमा मच्चिएको हाहाकार र जनमानसमा बढेको आक्रोशका कारण विभागीय मन्त्रीदेखि प्रधानमन्त्रीसम्म दबाबमा परे । यही दबाब, चौतर्फी आलोचना र आक्रोशको सामना गर्न नसकेर तत्कालीन उद्योग, वाणिज्य तथा आपूर्तिमन्त्री गौरीकुमारी यादवले राजीनामा समेत दिइन् । लगत्तै दीपककुमार साहले सोही मन्त्रालयको कमान्ड सम्हालेका छन् । तर, साहले मन्त्रालयको कमान्ड सम्हाल्नेबित्तिकै सबैको घरघरमा सिलिन्डर पुगिहाल्छ भन्ने कुनै ठोस आधार अझै देखिएको छैन । यदि त्यसो हुन्थ्यो भने मन्त्री फेरिएको चार दिनमै अवस्था केही सहज हुनुपथ्र्यो, तर बजारमा ग्यासको अभाव उस्तै छ । महिनौंदेखि जनताले भोग्दै आएको सास्ती केवल विभागीय मन्त्री फेरिँदैमा समाधान हुने अवस्था देखिँदैन । किनकि, यो ग्यास संकट कुनै एउटा मन्त्री वा सरकारको क्षणिक कार्यसम्पादनका कारण मात्र आएको होइन; यो त वर्षौंदेखिको संरचनात्मक त्रुटि, नीतिगत असफलता, व्यापारिक सिन्डिकेट र पूर्वाधारको चरम अभावका कारण सिर्जित बहुआयामिक समस्या हो । यद्यपि, नवनियुक्त मन्त्री साहले जनतालाई आवश्यक परिमाणमा ग्यास उपलब्ध गराउन तत्काल कदम चाल्ने औपचारिक प्रतिबद्धता भने व्यक्त गरेका छन् ।