चिलिमे सुरुङ उद्धार : अर्को चमत्कारको प्रतिक्षा, दिनरात हुँदैछ काम, १२० मिटरभित्र जे देखियो…(भिडियोसहित)

काठमाडौं– यही भदौ १० गते रसुवाको भोटेकोशीमा आएको महाप्रलयकारी बाढीले निम्त्याएको संकट १९औँ दिनसम्म आइपुग्दा पनि टर्न सकेको छैन । अझै हजारौँको संख्यामा मानिसहरू बेपत्ता हुँदा अधिकांश परिवारहरूले आफन्त फर्किने आश मार्दै गएका छन् भने केही परिवार र आफन्तहरूमा अझै पनि आशाको दियो बलिरहेकै छ । सरकारले खोज तथा उद्धार कार्यमा अहिलेसम्म देखाएको निरन्तरको सक्रियताका कारण पनि पीडित परिवारहरू आशान्वित पर्खाइमा छन् । त्यसमा पनि विभिन्न जलविद्युत् आयोजनाका सुरुङमा फसेकाहरूका परिवार फेरि चामत्कारिक उद्धारको पर्खाइमा छन् । किनकि सरकारले रसुवा र नुवाकोटका विभिन्न ६ वटा जलविद्युत् आयोजनाका टनेलहरूमा खोजी कार्य जारी राखेको छ । नेपाली सेनासहितका सुरक्षा निकाय, विज्ञ प्राविधिक टोली र विदेशी विशेषज्ञ टोली १९औँ दिनसम्म पनि अनवरत रूपमा खटिइरहेका छन् । जहाँ अहिले चिलिमे जलविद्युत् आयोजनाको सुरुङमा भइरहेको उद्धार कार्यले सबैको ध्यान केन्द्रित गरेको छ । किनकि उक्त सुरुङभित्र जीवित रहेको आशा गरिएका ६ जना चमत्कारको आशामा अन्तिम साससँग लडिरहेका छन् ।
हाइड्रोको भूमिगत विद्युतगृहमा कर्मचारीहरू जीवितै रहेको आशा गरिएको छ । सुरुङ साँघुरिएको स्थान करिब १२० मिटर भित्रबाट आवाज पठाउँदा त्यसको प्रतिध्वनि (इको) सुनिएको र त्यहाँबाट चिसो हावा समेत आइरहेकाले सुरुङभित्र फसेका व्यक्तिहरू सकुशल हुनसक्ने र जीवितै उद्धार गर्न सकिने आशा अझै मरेको छैन । जसका लागि अहिले सम्पूर्ण जनशक्ति परिचालन गरेर युद्धस्तरमा काम भइरहेको छ ।