शीर्ष स्थानको बेल्जियमले इटालीको विजयी यात्रामा लाउन सक्ला पूर्णविराम

काठमाडौँ – यूरोकप अर्थात् मिनी विश्वकप । यसलाई मिनी विश्वकपको उपाधि यस कारण पनि दिइयो कि यो विश्वकप पछि सर्वाधिक रुचाईको प्रतियोगिता हो । यूरोकपको खेल स्तरले पनि यो कुरालाई पुष्टि गर्छ । त्यही यूरोकपमा आजबाट क्वाटरफाइनलका खेलहरु सुरु हुँदैछन् ।

यूरोकप सुरु भए देखि नै अप्रत्यासीत नतिजाले सबैको ध्यान आकृष्ट गरेको छ । जसले गर्दा यो यूरोकप झन् रोमाञ्चक हुँदै गईरहेको छ । अप्रत्यासित नतिजासँगै २२ दिनपछि आजबाट यूरोकप क्वाटरफाइनलमा प्रवेश गरेको छ । पहिलो क्वाटरफाइनलमा दुई वटा खेलहरु हुँदै छन् । पहिलो खेल राति ९ः४५ मा तीन पटकको यूरोकप विजेता स्पेन र पहिलो पटक यूरोकपको क्वाटरफाइनल पुगेको स्विट्जरल्याण्डबीच हुँदैछ भने दोस्रो खेलमा राति १२ः४५ बजे बेल्जियमले ईटालीको सामना गर्दै छ ।

यी दुई बिचको विजेताले सेमीफाइनलको यात्रा तय गर्नेछन् । स्विट्जरल्याण्ड र स्पेनको खेलको समग्र नतिजा हेर्ने हो भने स्पेन नैै हावी भएको इतिहासले देखाउँछ । उनीहरुबीच अहिलेसम्म जम्मा २२ पटक खेल भएकोमा स्पेनले १६ पटक जित हात पार्दा पाँच पटक बराबरी खेलेको छ भने, एक पटक स्विट्जरल्याण्डले जितेको छ । सन् २०१० मा दक्षिण अफ्रिकामा भएको विश्वकपको समूह चरणको खेलामा स्पेनलाई १–० ले पराजित गरेको थियो । तर त्यसै वर्ष विश्वकपको उपाधि स्पेनले जितेको थियो ।

स्टार खेलाडीले भरिएको स्पेनले समूह चरणमा सोचे जस्तो खेल प्रर्दशन गर्न नसके पनि पछिल्लो दुई खेलले लयमा फर्केको देखाएको छ । उसले दुई खेलमा १० गोल गरेको थियो । जुन कि यूरोको इतिहासमा लगातार दुई खेलमा ५–५ गोल गर्ने पहिलो टिम बनेको छ । त्यस्तै फ्रान्सलाई अन्तिम १६ मा पाखा लगाएर क्वाटरफाइनल प्रवेश गरेको स्विट्जरल्याण्डको आत्मबल भने उच्च रहने छ । स्विट्जरल्याण्डले त्यही उच्च मनोबलका साथ जितको शिलशिलालाई कायम नै राख्दै स्पेन विरुद्ध मैदानमा उत्रने छ ।

त्यस्तै, दोस्रो खेलमा दुई ह्याभिवेट राष्ट्र भिड्दै छन् । ह्याभिवेट यस अर्थमा कि फिफा वरीयतामा शीर्ष स्थानमा बेल्जियम रहेको छ भने इटालीले पछिल्ला ३१ खेलमा हारको सामना गर्ने परेको छैन । समूह चरण सजिलै पार गरेको इटालीले नक आउट चरणमा भने अष्ट्रियासँग कडा चुनौतीको सामना गर्नु परेको थियो । इटालीले सन् २०१८ मा नेसन्स लिगमा पोर्चुगलसँग हारे यता हार व्यहोरेको छैन । तर, बेल्जियमले उही पोर्चुगललाई पराजित गरेर अन्तिम आठसम्मको यात्रा तय गरेको हो । त्यसै कारण पनि यस खेलले सबैको ध्यान तानेको छ ।

इटालीको रक्षात्मक पंक्ति कडा देखिरहेको अवस्थामा बेल्जियमको आक्रमणमा भने केही धक्का लागेको छ । बेल्जियमको दुई की प्लेयर कप्तान इडेन हाजार्ड र केभिन डी ब्रुयन घाइते छन् । उनीहरु आजको खेलमा उपलब्ध छन् वा छैनन् त्यसका लागि भने खेलको प्रतीक्षा नै गर्नु पर्ने छ । त्यसो त बेल्जियमको बेञ्च पनि त्यतिकै बलियो रहेका छ । नापोलीबाट व्यवसायीक फुटबल खेल्दै आएका मार्टेन्स र यस वर्ष एथ्लेटिको मड्रीडलाई ला लिगाको उपाधि जिताएका यानिक फरेरा कर्रास्को पनि बेल्जियमको बेञ्चमा रहेका छन् । यसका लागि पनि प्रशिक्षक रोबर्टाे मार्टिनेज केही पक्कै पनि सोचेका होलान् ।