काठमाडौं– नेपाली कांग्रेसका पूर्वसभापति शेरबहादुर देउवा स्वदेश फर्किंदै गर्दा उनले दुई चिरा परेको कांग्रेसलाई एक बनाउँछन् भन्ने धेरैले अपेक्षा गरेका थिए । तर त्यसो हुन सकेन, बरु उनी कुनै एक समूहको भेलालाई सम्बोधन गर्न पुगे । त्यति मात्रै होइन, एयरपोर्टमा ओर्लिंदै गर्दा नरम देखिएका उनी कांग्रेस इतर पक्षको सम्पर्क कार्यालयमा पुग्दा गरम रुपमा प्रस्तुत भए । विशेष महाधिवेशनबाट नेतृत्व परिवर्तन भए पनि सर्वोच्च अदालतले निस्सा जारी गरेसँगै सक्रिय राजनीतिबाट सन्यासको घोषणा गरेका उनी कांग्रेस सभापतिकै रूपमा सभापति गगन थापालाई काउन्टर दिइरहेका छन् । देउवाको प्रमुख आतिथ्यतामा भएको संस्थापनइतर पक्षको राष्ट्रिय भेला ‘राष्ट्रिय सम्मेलन’मा परिणत भयो । यो सम्मेलनले दिएको एउटा सन्देश के हो भने १४औँ महाधिवेशनको कार्यसमिति नै आधिकारिक हो, अर्थात् देउवाको नेतृत्वमा नै १५औँ महाधिवेशन गर्ने भन्ने हो । त्यस्तै देउवाको निर्देशनमा अहिलेका राष्ट्रिय सम्मेलन संयोजकले नै महाधिवेशनको संयोजन गर्ने निर्णयसमेत पारित गरेको छ । देउवा पक्षीय कांग्रेसको नेतृत्व बीपी पुत्र शशांक कोइरालालाई दिनु र अबको देउवाको उत्तराधिकारी पनि उनै शशांक रहेको सन्देश सम्मेलनले दिएको छ ।
देश
प्रतिक्रिया