Breaking

इनम प्रकरण : न्यायालयमा युटर्न, रास्वपा ब्याक हुँदा बेन्चमा फर्किए विवादित न्यायाधीश, अनुसन्धानमै गोलमाल (भिडियोसहित)

योहो संवाददाता

काठमाडौं– ३० वर्षे ठिटोले राज्यका मुख्य अङ्गहरूदेखि महत्त्वपूर्ण निकायसम्म बलियो पहुँचको बलमा गरेका आपराधिक गतिविधिहरूले सार्वजनिक वृत्तमा दिनप्रतिदिन तरङ्ग उत्पन्न गरिरहेका छन् । प्रधानमन्त्री कार्यालयदेखि न्यायालय, प्रहरी हेडक्वार्टर र उद्योगीहरूसम्म बलियो पहुँच बनाएर बिचौलियाको भूमिका निभाएको आरोपमा पक्राउ परेका इनम सापकोटाको चर्चा कुनै सेलिब्रेटीको भन्दा कम छैन । त्यसमाथि राज्यलाई नै अचम्मित पार्ने उनका आपराधिक गतिविधिहरूको शृङ्खला कुनै थ्रिलर फिल्मभन्दा कम छैन । देशका शीर्ष नेताहरूदेखि उच्च तहका व्यक्तिसम्म उनको आपराधिक कर्ममा सामेल भएका नयाँ–नयाँ तथ्यहरू बाहिरिँदै छन् । जहाँ यिनै ३० वर्षे सापकोटाको सेटिङको साम्राज्यमा न्यायाधीशहरू नै जोडिएको विषयले देशको न्यायालय नै बदनाम बन्यो । पूर्वप्रधानन्यायाधीशदेखि बहालवाला प्रधानन्यायाधीश र न्यायाधीश नै मुद्दाको सेटिङजस्तो आपराधिक गतिविधिमा संलग्न भएका तथ्यहरू सार्वजनिक भए । सर्वोच्च अदालतका न्यायाधीशहरू लर्को लागेर बिचौलियालाई भेट्न गएको र मुद्दा किनबेच गरेको आरोपसमेत लाग्यो । शृङ्खलाबद्ध रूपमा सार्वजनिक भएका यस्ता तथ्यहरूले न्यायपालिकाको स्वतन्त्रता र न्यायमूर्तिहरूको निष्पक्षतामाथि गम्भीर प्रश्नहरू खडा गरे । लगत्तै प्रधानमन्त्री बालेन्द्र शाह र रास्वपा सभापति रवि लामिछानेबीच विवादित न्यायाधीशहरूमाथि महाभियोग लगाउने गरी छलफल भयो ।