काठमाडौं— राष्ट्रिय स्वतन्त्र पार्टी (रास्वपा) को नेतृत्वमा सरकार गठन भएको सय दिन पूरा भएको छैन, तर रास्वपाका सबैभन्दा अब्बल मानिएका मन्त्री नै आफ्नै गतिविधिका कारण आर्थिक अपराधी र राजद्रोही जस्तो गम्भीर आरोपको भुमरीमा फसेका छन् । सरकारका सबैभन्दा विज्ञ र अनुभवी अर्थशास्त्री भन्दै सबैको भरोसा र आशाको केन्द्र बनेका अर्थमन्त्री स्वर्णिम वाग्ले अहिले आफ्नै कार्यशैली र सत्ताको उन्मादका कारण गम्भीर आरोप खेपिरहेका छन् । सगौरव आफ्नो पहिलो बजेट प्रस्तुत गरेका वाग्ले पहिलो अवसरमै विवादमा तानिएका छन् । वाग्लेमाथि निहीत स्वार्थका लागि बजेट प्रस्तुत हुनुभन्दा अगावै करका दरसम्बन्धी सूचना चुहाएर सीमित व्यापारीहरूलाई अर्बौं रुपैयाँको कर छली गर्न ‘सेटिङ’ मिलाएको आरोप छ । संसदमा प्रस्तुत गरिएको बजेटमा उनले सीमित व्यापारी र बिचौलियाहरूलाई पोस्ने गरी करका दरमा गरेको हेरफेरले उनको छद्म रुप छताछुल्ल पारिदिएको छ । अहिले सदनमा प्रधानमन्त्री बालेन्द्र शाहको विवादित अभिव्यक्तिले निकास नपाउँदै प्रधानमन्त्रीकै ‘विज्ञ मन्त्री’ को यो कर्तुतको पनि व्यापक विरोध भइरहेको छ । सोही कारण मंगलबारको संसद बैठकमा राष्ट्रिय प्रजातन्त्र पार्टी (राप्रपा) की प्रमुख सचेतक खुश्बु ओलीले अर्थमन्त्री वाग्लेको राजीनामा नै मागिन् ।
देश
प्रतिक्रिया