बालेन ः फास्ट ट्रयाकमा संविधान संशोधन, शक्तिशाली बन्ने प्रावधान, कांग्रेस–एमालेको साथ अपरिहार्य (भिडियोसहित)

काठमाडौं— राष्ट्रिय स्वतन्त्र पार्टी (रास्वपा) ले आफ्नो चुनावी घोषणापत्रको बुँदा नम्बर १० मा सरकार गठन भएको तीन महिनाभित्र संविधान संशोधनका प्रस्तावहरूबारे ‘बहस पत्र’ तयार गर्ने उल्लेख गरेको थियो । सोही अनुरूप बालेन्द्र शाहको नेतृत्वमा सरकार गठन भएको केही घण्टामै बसेको पहिलो मन्त्रिपरिषद् बैठकले स्वीकृत गरेको शासकीय सुधारसम्बन्धी १०० वटा कार्यसूचीको बुँदा नम्बर ४ मा संविधान संशोधन ‘बहस पत्र’ तयार गर्न कार्यदल गठन गर्ने निर्णय ग¥यो । त्यसको तीन दिनपछि बसेको दोस्रो मन्त्रिपरिषद् बैठकले प्रधानमन्त्री बालेन्द्र शाहका प्रमुख राजनीतिक सल्लाहकार असिम साहको संयोजकत्वमा कार्यदल गठन ग¥यो । संविधान संशोधनलाई रास्वपाको मात्र मुद्दा नबनाई राष्ट्रिय सहमतिमा अघि बढाउने कार्यदलले जनाएको छ । सोहीअनुसार असिम साहको नेतृत्वमा बनेको कार्यदलले संविधान संशोधनका विषय पहिल्याउन राजनीतिक दल, संवैधानिक कानुनका विज्ञ, पूर्वन्यायाधीश, पूर्वमहान्यायाधिवक्ता, वरिष्ठ अधिवक्ता, पूर्वमुख्यसचिव, प्रशासक, सञ्चारकर्मी र जेनजी अभियन्ताहरूसँग छलफल गरिसकेको छ । यद्यपि, पूर्वप्रधानमन्त्री, पूर्वराष्ट्रपति र सरोकारवालाहरूसँगको छलफल भने बाँकी नै छ । सबै पक्षको राय–सुझाव लिने चरणमा रहेको कार्यदलले शासकीय स्वरूप, निर्वाचन प्रणाली, न्यायपालिका र संघीयतासहित ८ बुँदे प्रस्ताव तयार पारेको छ । जसमा प्रत्यक्ष कार्यकारी राष्ट्रपति, उपराष्ट्रपतिलाई राष्ट्रिय सभाको अध्यक्षको जिम्मेवारी, विदेशमा रहेका नेपालीलाई मताधिकार, विज्ञ मन्त्री र न्यायाधीशको पुनर्नियुक्ति जस्ता विषय समेटिएका छन् ।