सुदन गुरुङ ः सडकबाट सदन पुगे, गृहमन्त्री खोजे, रवि–बालेन मिलाउँदा पनि छैन भाग, सुशीलाको पाउमा (भिडियोसहित)

काठमाडौं— जेनजी आन्दोलनमा स्वयंसेवकदेखि अन्तरिम सरकार गठनमा ‘किङमेकर’को भूमिका निभाएका सुदन गुरुङ अब संसद् प्रवेश गर्दै छन् । भदौ २३ गते ‘हामी नेपाल’ नामक आईएनजीओबाट पानी बाँड्न गएका गुरुङ, आन्दोलनको ‘स्टेक होल्डर’देखि जनअनुमोदित सांसदसम्म भएका छन् । योसँगै तत्कालीन माओवादी र कांग्रेसको स्थापित गढ भत्काउँदै १४ हजारभन्दा बढी मतान्तरले जित हासिल गरेका गुरुङले अब सदनमा गोरखा क्षेत्र नम्बर १ का जनताको प्रतिनिधित्व गर्नेछन् । सुशीला कार्की नेतृत्वको अन्तरिम सरकारमा मन्त्री नियुक्तिको प्रत्यक्ष भूमिकामा देखिएका उनी बालेन्द्र साह, रवि लामिछाने र कुलमान घिसिङबीचको सहमतिमा समेत सूत्राधारको भूमिकामा देखिए । यस्तै, उम्मेदवारी दर्ताको केही दिनअघि मात्रै रास्वपा प्रवेश गरेका उनले आफ्नै जन्मथलो गोरखा–१ बाट उम्मेदवारी दिए र वर्षौँ पुरानो साइनो–सम्बन्धको धागो जोड्दै चुनावमा विजेता भएर आए । चुनाव जितेलगत्तै उनले गोरखाका जनताका लागि सक्रियता देखाएका छन् । गोरखाका विभिन्न दुर्गम क्षेत्रमा सञ्चार सेवामा समस्या रहेकाले त्यसको समाधानको माग गर्दै उनी बिहीबार नेपाल टेलिकमको केन्द्रीय कार्यालय पुगे । जिल्लाका ११ भन्दा बढी स्थानमा तत्काल टावर जडान गरी जनतालाई सञ्चारको पहुँचमा पु¥याउन भन्दै उनले पत्र बुझाएका छन् । यस्तै, उनले निर्माणाधीन नयाँ संसद् भवनको अवलोकन समेत गरेका छन् ।