चुनावको डेन्जर जोनमा एमाले, ओली र शंकरलाई नै घण्टी तरबार, पदाधिकारीमा हार्ने डर, युवा जित्दै (भिडियोसहित)

काठमाडौं— नेकपा एमालेका १९ जना पदाधिकारीमध्ये ११ जना प्रत्यक्ष निर्वाचनका लागि प्रतिस्पर्धामा होमिँदा दुई जना समानुपातिकबाट नै सांसद बन्ने दाउमा छन् । उपाध्यक्ष रामबहादुर थापा ‘बादल’ आदिवासी जनजाति क्लस्टरबाट समानुपातिकको पहिलो र महिलातर्फ सचिव पद्माकुमारी अर्याल पहिलो नम्बरमा पर्दा सुरक्षित बनेका छन् । तर, अध्यक्षसहित बाँकी पदाधिकारीहरूलाई भने अधिकांश क्षेत्रमा राष्ट्रिय स्वतन्त्र पार्टी (रास्वपा) ले नै कडा टक्कर दिने देखिन्छ ।
जेनजी आन्दोलनपछि ‘खलपात्र’ का रूपमा चित्रण गरिएका एमाले अध्यक्ष केपी शर्मा ओलीलाई यो चुनाव अहिलेसम्मकै सबैभन्दा कठिन हुने देखिन्छ । विगतका निर्वाचनहरूमा उनको नाम मात्रैले चुनाव जित्ने अवस्था रहे पनि यसपटक भने ओलीको प्रतिस्पर्धी रास्वपाका वरिष्ठ नेता बालेन्द्र साह (बालेन) बन्दा पुरानै सूत्रले काम गर्ने कुनै गुञ्जायस छैन ।