कांग्रेसमा भित्रभित्रै दौडधुप, संसद ब्युँताउन लागे सांसद, अब सदनबाटै जेनजीका माग पूरा गर्छौं (भिडियोसहित)

काठमाडौं— देशव्यापी जेन–जी विद्रोहको आगोले राजनीतिक दियो झोसिँदा, त्यसको राप प्रमुख प्रतिपक्षी दल नेपाली कांग्रेसको केन्द्रीय कार्यालय सानेपासम्म पुगेको छ । गत भदौ २३ र २४ गतेको जेन–जी आन्दोलनले प्रतिनिधि सभा विघटन भयो, सरकार ढल्यो र पूर्वप्रधानन्यायाधीश सुशीला कार्कीको नेतृत्वमा अन्तरिम सरकार बन्यो । यही सरकारले आगामी फागुन २१ गतेका लागि निर्वाचन घोषणा गरिसकेको छ । तर, कांग्रेसभित्र भने निर्वाचन कि विघटित संसदको पुनस्र्थापना भन्ने विषयमा ठूलो मतभेद देखिएको छ । कार्यवाहक सभापति पूर्णबहादुर खड्काको अध्यक्षतामा जारी केन्द्रीय कार्यसमिति बैठकमा यही मुद्दाले प्राथमिकता पाएको छ । एकातिर, सभापति शेरबहादुर देउवा सिंगापुरमा उपचाररत रहँदा पनि उनकै निर्देशनमा केही पूर्वसांसदहरूले संसद पुनस्र्थापनाको माग गर्दै हस्ताक्षर अभियान नै चलाएका छन् । अर्कोतिर, महामन्त्री गगन थापा लगायतका नेताहरूले निर्वाचन नै एकमात्र संवैधानिक बाटो भएको भन्दै सार्वजनिक रूपमै असन्तुष्टि जनाएका छन् । यो विवादले कांग्रेसलाई दुई कित्तामा बाँडेको छः ‘सांसद अधिकार’ खोज्ने पक्ष र ‘जेन–जी म्यान्डेट’ विरुद्ध नजाने पक्ष ।