सीके संकटमा परेपछि रवि र रेशमको साथ खोजे, पार्टी चार टुक्रा, मधेशमा भारत हाबी, महन्थलाई सत्ता (भिडियोसहित)

काठमाडौं— कुनै समय स्वतन्त्र मधेशको नारा लगाउने डा. सीके राउत नेतृत्वको जनमत पार्टी, जुन मधेशवादी दलहरूको वैकल्पिक शक्तिको रूपमा उदाएको थियो, आन्तरिक द्वन्द्वकै कारण विभाजनको चपेटामा परेको छ । सात वर्षअघि निकै उत्साहका साथ मधेशमा वैकल्पिक शक्तिका रूपमा उदाएको यो पार्टी अहिले चार टुक्रामा विभाजित भइसकेको छ, जसले गर्दा यो दल पनि अन्य मधेशवादी दलभन्दा फरक देखिन सकेन । राउत नेतृत्वको जनमत पार्टीबाट विद्रोह गरेका नेताहरूले दीपक साहको नेतृत्वमा ‘जनस्वराज पार्टी’ गठन गरेका छन् । यस्तै, कैलाश महतोको नेतृत्वमा ‘स्वाधीन मधेश जनअभियान’ पहिलेदेखि नै सक्रिय छ । संघीय सरकारमा मन्त्री बनिसकेका अब्दुल खान पनि नयाँ पार्टी खोल्ने विषयमा विचार–विमर्शमा छन् । २०७९ सालको चुनावमा मधेशको राजनीतिमा बलियो पकड राख्ने उपेन्द्र यादवलाई पराजित गर्नेदेखि बाराको उपनिर्वाचनमा उनलाई गठबन्धन गरेर लड्नुपर्ने अवस्थामा पु¥याउने डा. राउतको राजनीतिक यात्रा एकाएक कमजोर बन्दै गएको छ । निर्वाचनपछि मधेश प्रदेशको मुख्यमन्त्रीसमेत आफ्नै पार्टीको बनाएका राउत अहिले त्यही पद गुमाएर निरीह बनेका छन् । पार्टी छाडेर जाने नेताहरूले अध्यक्ष राउतको तानाशाही प्रवृत्ति र परिवारवादका कारण आफूहरू बस्न नसकेको आरोप लगाएका छन् ।