प्रचण्डले नेतृत्व नछाड्ने, जेनजीको मुद्दा आफैँले बोक्ने, हटाउन खोज्ने जनार्दनमाथि नै प्रहार (भिडियोसहित)

काठमाडौं— जेनजी आन्दोलन उग्र बनेसँगै ज्यानको सुरक्षाका लागि निवास छाडेर सुइकुच्चा ठोकेका नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ फेरि पार्टीको सक्रिय राजनीतिमा फर्किएका छन् । आन्दोलनका कारण सुरक्षा चुनौती बढेपछि सेनाको शरणमा पुगेका प्रचण्ड, एक सातापछि देखा पर्दा पार्टी हाँक्ने उनको हुटहुटी अझै जीवितै रहेको छनक दिइरहेका छन् । आन्दोलनको दोस्रो दिन अर्थात् भदौ २४ गते खुमलटारस्थित निवास छोडेका प्रचण्डले भदौ ३१ गते पार्टी कार्यालय पेरिसडाँडा पुगेर क्षतिग्रस्त भवनको अवलोकन गरे । उनले आगजनीले राख बनेको कार्यालयको अवलोकनमात्रै गरेनन्, खरानी समेत कोट्याएर पुनः उठ्ने दृढता व्यक्त गरे । दाँयाबाँया पम्फा भुसाल र वर्षमान पुन र पछाडि अग्नि सापकोटालाई राखेर प्रचण्डले आफूहरू अझ भव्य भवन निर्माणसँगै पार्टीलाई पनि सशक्त बनाएर जाग्ने अभिव्यक्ति दिन भ्याए ।