काठमाडाौं—केही समयअघि मात्रै प्रदर्शनमा आएको ब्लकबस्टर हिट दक्षिण भारतीय चलचित्र ‘पुष्पा २’को एउटा डाइलग चर्चित छ, ‘पुष्पा झुकेगा नही’ । त्यही डाइलग काठमाडौं महानगरपालिकाका मेयर बालेन शाहको कार्यशैलीमा मेल खाने देखिन्छ । मेयर शाह कुरा कम, काम बढी गर्नेमा पर्छन् । गलत प्रवृत्ति र भ्रष्टाचारविरुद्ध उनले विगतदेखि नै खरो रुपमा आवाज बुलन्द गर्दै आएका छन् । पछिल्लो समय अमेरिकाले अवैध रुपमा बसेका आप्रवासिलाई धमाधम सम्बन्धित देश पठाउन थालेसंगै र अमेरिकाले गरिब देशहरुलाई प्रदान गर्दै आएको सहयोगलाई कटौती गर्न थालेपछि मेयर बालेन शाहले अमेरिकी राष्ट्रपति ट्रम्पलाई सम्बोधन गर्दै बिहीबार राति एक स्टाटस लेखे । स्टाटसमा उनले भनेका छन् ः
प्रिय डोनाल्ड जे ट्रम्प,
हामीलाई हाम्रो देश तपाईंको भन्दा राम्रो छ भनेर महसुस गराउनु भएकोमा धन्यवाद ।हामी गरिब छौं किनभने हाम्रा मानिसहरू हाम्रो देश छोडेर जाँदैछन्। तपाईं गरिब हुनुहुन्छ किनकि तपाईंका मानिसहरूले तपाईंको देश बनाउन सक्दैनन् । तपाईंहरु अल्छी हुनुहुन्छ । कृपया आफ्नो अभिलाषा दासत्व पनि बन्द गर्नुहोस् । हामीले हाम्रा रत्नहरू फिर्ता पाउनेछौँ ।
यस्तै मेयर शाहलेशुक्रबार बिहान सामाजिक सञ्जालमा फेरि अर्को स्टाटस लेखे । उनले भारत, अमेरिका र चीनले हेपेको भन्दै आफूलाई मेयर हो भन्ने बिर्सेर नेपाली भएर बाँच्ने आधार दिन प्रधानमन्त्री केपी शर्मा ओलीलाई आग्रह गरेका छन् । उनी लेख्छन्–
‘प्यारो प्रधानमन्त्रीज्यू, अमेरिकाले (भ्रष्ट) भनिसक्यो, इन्डियाले भिकारी भनिसक्यो र चीनले मान्छे गन्दैन, मलाई मेयर हो भनेर बिर्सिनुस्, नेपाली भएर बाँच्ने आधार त दिनुस् ?’ उनले करिब १२ घण्टाको अन्तरालमा लेखेका दुई स्टाटसमा धेरैले प्रशंसा गरेका छन् ।उनले काठमाडौं महानगरको नेतृत्व हाँकेसंगै सिंगो काठमाडौंको मुहार फेरिँदै गएको छ ।कुनै पनि काम अगाडि बढाउनु पूर्व उनी नेतृत्वको टिमले गर्ने अध्ययन र तयारीका कारण महानगरले गरेका कामहरुले प्रशंसा पाउने गरेको छ । लामो समयदेखि टाउको दुखाई बनेको काठमाडौंको फोहोर व्यवस्थापन केही हदसम्म मेयर बालेनले हल गरेका छन् । फलतः काठमाडौं सहर पहिलेको तुलनामा सफा र सुन्दर देखिन थालेको छ । यस्तै पछिल्लो समय न्यूरोडको फुटपाथ विस्तार र व्यवस्थापनले सिंगो न्यूरोडको रौनकतालाई नै बढाएको देखिन्छ । जसले मेयर शाहको कामको चौतर्फी चर्चा भइरहेको छ ।
यता, ७२ सालको भूकम्पले भत्किएको दरबार हाईस्कुल चीनको सहयोगमा पुनर्निर्माण भएसँगै सञ्चालन र व्यवस्थापनमामहानगरले खेलेको भूमिका प्रशंसनीय रहेको छ । नेपालकै पुरानो र ऐतिहासिक दरबार हाईस्कुलमा आधुनिक प्रविधिसहित पठनपाठन कार्य भइरहेको छ । भानु माध्यामिक दरबार हाईस्कुललाई महानगरले राम्रो साथ दिएका कारण अब नेपालकै नम्बर एक सामुदायिक विद्यालय बन्ने विद्यालयका सहायक प्रधानाध्यापक दाबी गर्छन् ।
भिआईपीहरुको जमघट हुने ठाउँका रुपमा परिचित काठमाडौंको दरबारमार्ग पनि एक समय अस्तव्यस्त पार्किङ, खाल्डाखुल्डी सडकले कुरुप बनेको थियो । तर हाल त्यहाँ काठमाडौं महानगरपालिकाका मेयर शाहको नजर परे पछि सिंगारिँदै छ । दरबारमार्गको पैदल मार्ग क्षेत्रमा महानगरले चिल्लो ग्रेनाइड राख्ने काम धमाधम गरिरहेको छ । उनको कामलाई देखेर व्यापारीदेखि स्थानीय नागरिकसम्म हर्षित छन् ।
कुनै समय व्यापारी र ठेकेदारको चंगुलमा परेको काठमाडौंको ऐतिहासिक महत्व बोकेको खुला मञ्च हाल महानगरले खाली गराएसंगै यसको मुहार पनि फेरिएको छ । खुद्रा व्यापारी, मान्छेको भिडभाड र बसपार्कमा परिणत भएको खुला मन्चलाई मेयर शाह काठमाडौं महानगरको प्रमुखमा आएसंगै खाली गराएर । क्रंक्रिट र फोहोरले अस्तव्यस्त खुलामञ्चमा अहिले हरियो दुबो लगाएर सफा र हराभरा बनाइएको छ । यसका साथै उनले काठमाडौंका विभिन्न स्थानमा सरकारी जमिन अतिक्रमण गरी बनाइएका संरचनाहरु हटाएरखाली गर्ने अभियाननै चलाए । जसका कारण केही मानिसहरुको बिचल्ली भएको भन्दै एउटा पक्षले आलोचनासमेत गर्ने गरेको छ । माथिबाट ढलान गरी भूमिगत गरिएका काठमाडौंका केही खोलाको समेत उनले उत्खनन् गरे । जुन कार्यलाई लिएर केहीले आलोचनासमेत गरे । तर, आलोचनाकै बीच पनि मेयर बालेनको प्रशंसा गर्नेहरुको ठूलो जमात छ । त्यसैले एक व्यक्तिले चाह्यो भनेकतिसम्म परिवर्तन सम्भव छ भन्ने गतिलो उदाहरण बालेनको कामले देखाएको छ । यद्यपि, यसलाई नै बालेनले काठमाडौंको अवस्थालाई कायापलट गरे भन्ने होइन । काठमाडौंलाई व्यवस्थित र विकसित सहर बनाउन उनले अझै धेरै काम गर्न बाँकी छ । तर यो अवधिमा उनले जुन किसिमले काम गरेर देखाएका छन् त्यो भने प्रशंसनीय नै छ ।
प्रतिक्रिया