काठमाडौं– नर्सिङ पृष्ठभूमिकै व्यक्ति स्वास्थ्य तथा खाद्य स्वच्छता मन्त्री बन्दा पनि नर्सिङ पेसामा आबद्धहरूले आफ्ना माग सम्बोधन गराउन सत्याग्रह बस्नुपरेको छ । विभिन्न सरकारी अस्पतालमा करारमा काम गरेर हाल वीर अस्पतालमा नै नर्सिङ विषयमा स्नातकोत्तर गर्दै गरेकी ज्योति रानाभाट नर्सिङ क्षेत्रमा सुधारको माग राख्दै अनशनरत छिन् । यही साउन १४ देखि १५ बुँदे माग राखेर नर्सिङ काउन्सिलबाट सुरु भएको उनको अनशन अहिले वीर अस्पतालको आईसीयूको शय्यासम्म पुग्दा पनि जारी नै छ । रक्तचाप र सुगरको मात्रा कम भएपछि शनिबार वीर अस्पताल भर्ना गरिएकी उनको सरकारी अस्पतालमा करारमा काम गर्ने नर्सहरूको पारिश्रमिक तहअनुसार हुनुपर्ने र पर्याप्त नर्सिङ जनशक्तिको दरबन्दी सिर्जना हुनुपर्ने लगायत माग छन् । स्वास्थ्य क्षेत्रको नेतृत्व नै नर्सिङ पेसाबाट आएकी स्वास्थ्यमन्त्री निशा मेहताले गरिरहँदा पनि सरकारले नर्सिङ पेसालाई बेवास्ता गरेको ज्योतिको गुनासो छ । नर्सिङ पेसामा नै रहेर स्वास्थ्य तथा खाद्य स्वच्छता मन्त्रालयको नेतृत्व गर्ने ओहोदामा पुगेकी निशा मेहताकै पालामा नर्सहरूको माग पूरा गराउन आमरण अनशनको सहारा लिनुपरेको छ । यो स्वयम् स्वास्थ्यमन्त्री मेहताकै लागि पनि दुःखद कुरा हो, जसका कारण उनले संवादबाट नै समस्याको समाधान खोज्न आफू प्रतिबद्ध रहेको जनाउँदै वार्ता गरेकी छिन् ।
देश
प्रतिक्रिया