बीपीको उत्तराधिकारी बन्ने होडबाजी, शशांक नै विद्रोही, गगनको कब्जामा रुख, इतरपक्षको रुवाबासी (भिडियोसहित)

काठमाडौं– नेपालको राजनीतिक इतिहासमा थोरै मात्र यस्ता नामहरू छन्, जुन नामहरु युगौँयुगसम्म पनि बिर्सिने छैनन् । ती नामहरूमध्येकै एक नाम हो— विश्वेश्वरप्रसाद कोइराला अर्थात् बीपी कोइराला । यो केवल नाम मात्रै नभएर नेपालको राजनीतिक, सामाजिक र साहित्यिक इतिहासको एउटा युग र चेतना पनि हो । जहाँ बीपीकै दूरदर्शी चिन्तन, सोच, दर्शन र दृष्टिकोणले नेपालको समग्र राजनीति र राज्य व्यवस्थालाई नै दशकौँदेखि मार्गनिर्देश गरिरहेको छ । कोइराला केवल नेपाली कांग्रेसका लागि मात्रै आदर्श पुरुष नभएर नेपाली राजनीतिकै आदर्श, दूरदर्शी चिन्तक र जनक्रान्तिका नायकका रूपमा चिनिन्छन् । नेपालमा राजनीतिक स्वतन्त्रतासँगै सामाजिक न्याय र समानतामा आधारित ‘लोकतान्त्रिक समाजवाद’ को अवधारणा अघि सारेका उनलाई प्रजातान्त्रिक समाजवादका प्रणेता पनि भनिन्छ । २००७ सालमा बीपीकै नेतृत्वमा भएको प्रजातान्त्रिक आन्दोलनले देशमा प्रजातन्त्रको सुरुवात मात्रै गरेन, त्यही आन्दोलनको जग र दूरदृष्टिले नेपाललाई लोकतान्त्रिक गणतन्त्रात्मक राज्यसम्म ल्याई पु¥यायो । त्यसैले उनलाई युगपुरुष र जननायकका रूपमा व्याख्या गरिन्छ । जहाँ बीपीकै नाम, सिद्धान्त, विचार र आदर्शहरूलाई बेचेर नेपाली कांग्रेसले ७ दशकदेखि नेपालको राष्ट्रिय राजनीति र राज्यसत्तामा आफ्नो छुट्टै पहिचान बनायो । तर विडम्बना, कहिल्यै पनि बीपीका विचार, सिद्धान्त र आदर्शलाई आत्मसात् गर्न सकेन ।