काठमाडौं– संसद्को सबैभन्दा कान्छो दल राप्रपाले झन्डै दुई–तिहाइ जनमत पाएको राष्ट्रिय स्वतन्त्र पार्टी (रास्वपा) लाई हायलकायल पारिरहेको छ । जम्मा ५ जना सांसद रहेको राप्रपाका दुई सांसद ज्ञानेन्द्र शाही र खुस्बु ओलीले संसददेखि अन्य कार्यक्रममा प्रधानमन्त्री, रास्वपा सभापतिदेखि सामान्य रास्वपाका कार्यकर्तालाई एकै डालोमा हालेर सबक सिकाइरहेका छन् । अहिले राप्रपा रास्वपासँग भिड्न तयार देखिएको छ । रास्वपालाई पनि प्रमुख प्रतिपक्ष दल नेपाली कांग्रेसभन्दा राप्रपाका प्रश्नले बढी बिच्क्याइरहेको छ । राप्रपाका संसदीय दलका नेता रहेका ज्ञानेन्द्र शाहीले सरकारको जग हल्लाउने गरी निरन्तरको खबरदारी बुलन्द बनाउँदै आएका छन् । शाही दुई–तिहाइको सरकारलाई धर्मराउने गरी जबरजस्त ढङ्गले उभिरहेका छन् । सुकुम्बासीमाथि गरिएको ज्यादती, सवारी दुर्घटनापछि राज्यको भूमिका, नागरिकमा देखिएको निराशा र आत्मदाहसँगै राज्यले सिर्जना गरेको आतङ्कबारे सरकारमाथि ज्ञानेन्द्र सबैभन्दा खरो उत्रिने गरेका छन् । संसद्मा मात्र होइन, शाहीले विदेशी मञ्चबाट पनि रास्वपाको खोइरो खनिरहेका छन् । उनले विशेष गरी सामाजिक सञ्जालमा अराजकता प्रकट गर्ने रास्वपाका समर्थकलाई नमज्जाले पाठ पढाइरहेका छन् ।
देश
प्रतिक्रिया