बालेन ः हौसिए प्रश्न गर्ने, युट्युबर पक्राउले ब्याक फायर, एमालेले खोज्यो बोली, डाक्टरको पनि काउन्टर (भिडियोसहित)

काठमाडौं— बालेन शाह नेतृत्वको सरकार बनेको १५ दिन बित्दै गर्दा सरकारले धेरै निर्णयहरू गरेका छन् । कतिपय निर्णयलाई सबैले स्वागत गरेका छन् भने कतिपय सरकारका काम कारबाही र निर्णयहरूप्रति प्रश्न उठेका छन् । सरकार गठन भएयता जनस्तर र राजनीतिक वृत्तमा उठेका पाँच मुख्य प्रश्नहरू के–के हुन् त ? हेरौँ बुँदागत रुपमा ः
१. प्रधानमन्त्रीलाई गाली गर्ने युट्युबर पक्राउ
पाँचथरका रोशन पोखरेलले सामाजिक सञ्जाल फेसबुकमा प्रधानमन्त्री बालेन शाहको नाम लिँदै गाली गरेपछि उनलाई पक्राउ गरियो । उनको पक्राउपछि कतिपयले यसलाई प्रेस स्वतन्त्रताको हनन भएको भन्दै प्रश्न उठाए । यद्यपि, उनले प्रयोग गरेका शब्दहरू मर्यादित नभएकाले पक्राउ पर्नु स्वाभाविक भएको तर्क पनि बलियो छ । तर, यस विषयले प्रधानमन्त्री बालेन शाहमाथि नै ‘ब्याक फायर’ भएको छ । हिजोका दिनमा ¥याप गायक भिटेनले अश्लील शब्द प्रयोग गरेको आरोपमा पक्राउ पर्दा बालेन शाहले नै ‘नेपाल प्रहरीको अरू केही काम छैन?’ भन्दै प्रश्न उठाएका थिए । विगतमा ‘बोल्न दे सरकार’ भन्दै गीत बनाउनेदेखि सामाजिक सञ्जालमा नयाँ–पुराना सबै दल र छिमेकी देश तथा मित्रराष्ट्रसम्महरूलाई अपशब्द प्रयोग गर्ने प्रधानमन्त्री शाह अहिले आफूविरुद्ध तिनै शब्द प्रयोग गर्दै अर्को कुनै व्यक्तिले बोल्दा पक्राउ गर्न अग्रसर देखिन्छन् ।