अस्पतालका ब्रम्हलुट, नर्समाथि अन्याय, १० हजारमै लगाउँछन् काम, सरकारको तलब कागजमा सीमित (भिडियो)

काठमाडौं–दिनरात बिरामीहरूको स्वास्थ्य सेवामा खटिने नर्सहरू आफ्ना माग सम्बोधन नभएको भन्दै पटक–पटक सडकमा उत्रिँदै आएका छन् । चिकित्सा क्षेत्रको मेरुदण्ड मानिने नर्सहरू अहिले फेरि आन्दोलित बनेका छन् । अस्पतालमा बिरामीको स्वास्थ्य उपचार सेवा छाडेर उनीहरुलाई सडकमा आउन बाध्य बनाउने अरू कोही नभई अस्पताल व्यवस्थापकहरू नै हुन् ।

बर्सेनि हजारौँ नर्सहरू आफूले सरकारी मापदण्डभन्दा आधा तलब–भत्तामा काम गर्नुपरेको, जोखिम भत्ता नपाएको तथा अपमानजनक व्यवहार भोग्नुपरेको भन्दै न्यायको माग गर्दै संघर्ष गरिरहेका छन् ।

सरकारले नर्सको न्यूनतम तलब भत्ता ३४ हजार ७ सय ३० रुपैयाँ तोके पनि १० देखि १५ हजार रुपैयाँमा काम गर्न बाध्य छन् । त्यसैले आफूहरुमाथि चरम शोषण भएको भन्दै विभिन्न अस्पतालहरूमा कार्यरत नर्सहरू फेरि आन्दोलित बनेका हुन् ।