बालेनकै खाकामा सुनिताका नयाँ योजना, ‘जेन जेड’ र ‘जेन अल्फा’ समेटिन्, फोहोरको गाँठो यसरी फुक्दै (भिडियोसहित)

काठमाडौं— काठमाडौँको राष्ट्रिय सभागृहमा आइतबार आयोजित नगरसभाको १९ औँ अधिवेशनमा महानगरपालिकाकी कार्यवाहक प्रमुख सुनिता डङ्गोलले आगामी आर्थिक वर्षको नीति तथा कार्यक्रम प्रस्तुत गरेकी छन् । महानगर प्रमुख रहँदा बालेन्द्र शाहले तीनवटा नीति तथा कार्यक्रम ल्याएका थिए । तर, उनी राजीनामा दिएर मूल राजनीतिमा होमिएपछि कार्यवाहक प्रमुखको रूपमा नगरको कमान्ड सम्हालेकी डङ्गोल एक किसिमको रफ्तारमा अघि बढिरहेकी छन् । यसअघि स्वतन्त्रबाट मेयर बनेका शाह र विभिन्न दलका वडाध्यक्षबीचको अन्तरद्वन्द्वका कारण विवादित बनेको महानगरमा डंगोलले विवाद समाधानको भूमिका निर्वाह गरेकी थिइन् । उही विवादका कारण बालेनलाई नीति तथा कार्यक्रम ल्याउनसमेत हम्मेहम्मे परेको थियो । बालेन प्रमुख हुँदा नै उपत्यकाको फोहोरमैला व्यवस्थापन नभएसम्म खादामाला नलगाउने बाचा गरेकामा अहिलेको नीति तथा कार्यक्रममा उक्त विषय प्राथमिकतामा परेको छ । साथै, महानगरपालिकाले ‘जेन जेड, जेन अल्फा’ विशेष कार्यक्रम सञ्चालन गर्ने र पहिलोपटक स्वास्थ्य सेवामा ‘निःशुल्क बाइक एम्बुलेन्स’ सेवालाई प्राथमिकतामा राखेको छ ।