प्रचण्डका जित्ने उम्मेदवार यस्ता, छोरी रेनुदेखि बामदेवसम्म, बालेन हराउन रञ्जित खटाए, अलमलमा माधव (भिडियोसहित)

काठमाडौं— आगामी फागुन २१ गतेको प्रतिनिधिसभा निर्वाचनलाई स्वीकार गरेका नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ तीन महिना अघिदेखि नै देश दौडाहामा छन् । १९ दललाई एकीकृत गरी नेकपा निर्माण गरेका प्रचण्ड आगामी निर्वाचनका लागि समानुपातिक उम्मेदवारको बन्दसूचीमा सन्तुलन मिलाउँदै प्रत्यक्षतर्फका उम्मेदवार चयनमा केन्द्रित भएका छन् । निर्वाचन आयोगले माघ ६ गतेभित्र उम्मेदवारको टुङ्गो लगाउनुपर्ने तालिका सार्वजनिक गरेसँगै प्रचण्डले रफ्तार बढाएका हुन् । निर्वाचनमा बहुमत ल्याउने लक्ष्यका साथ तयारीमा जुटेका प्रचण्डले यसपटक आफ्ना रणनीतिक कदमहरू चालेका छन् । उनले आफ्नो पुरानो निर्वाचन क्षेत्र चितवन–३ छोरी रेनु दाहाललाई सुम्पिएका छन् भने आफू रुकुम पूर्वबाट निर्वाचन लड्ने तयारीमा छन् । भरतपुर महानगरपालिकाको मेयरका रूपमा सफल भइसकेकी रेनु दाहालले पदबाट राजीनामा दिएरै चुनावी मैदानमा होमिँदै छिन् । यसअघि २०७९ को निर्वाचनमा गोरखा–२ बाट जितेका प्रचण्डले आफ्नो राजनीतिक जीवनमा अस्थिर निर्वाचन क्षेत्र रोज्ने गरेका छन् । यसअघि रोल्पा, काठमाडौं, सिरहा र चितवनबाट चुनाव लडिसकेका प्रचण्ड यसपटक विकासका आधारभूत पूर्वाधारको समेत अभाव रहेको रुकुम पूर्व पुग्नुलाई अर्थपूर्ण रूपमा हेरिएको छ । माओवादीको गढ मानिने यस जिल्लामा प्रचण्डको उम्मेदवारीले चुनावी माहोल तातिएको छ ।