ओलीलाई लपेटेरै स्थापित हुँदै शेखर, विद्या र रवि बोकेरै एमालेमाथि खनिए, शंकरको काउन्टर जवाफ (भिडियोसहित)

काठमाडौं— पार्टीभित्रै प्रतिपक्षीजस्तो भूमिकामा देखिने कांग्रेस नेता डा. शेखर कोइराला सभापति शेरबहादुर देउवादेखि अन्य नेतामाथि समेत टिप्पणी गर्न पछि पर्दैनन्, त्यसैले उनले सत्तारुढ दल एमालेलाई बाँकी राख्ने कुरै भएन । नेता कोइराला जहाँ–जहाँ पुग्छन्, त्यहाँ–त्यहाँ एमाले र प्रधानमन्त्री केपी शर्मा ओलीमाथि आलोचनाको वर्षा गरिहाल्छन् । सरकारमा एमालेसँगको सहकार्यलाई लिएर रुष्ट बनेका उनी बेला–बेला ठूलो दलको हैसियतले सरकारको नेतृत्व अब कांग्रेसले लिनुपर्ने भन्दै पार्टी सभापति देउवामाथि नै दबाब बढाउँछन् । त्यसो त, एमालेसँगको सहकार्यले कांग्रेसलाई झनै कमजोर बनाएको भन्दै सहकार्य तोडेर ठूलो दलको हैसियतमा आफ्नै नेतृत्वमा सरकार बनाउनुपर्ने उनको निचोड छ । यिनी तिनै नेता हुन्, जसले गत असारअघिसम्म कांग्रेस–एमाले मिल्नुको विकल्प छैन भन्दै वकालत गर्ने गरेका थिए ।