चीनको ‘इग्नोर’मा विद्या, भएन भीआईपी भेट, वाम एकता–ओली तगारो, …अनि टाढिए प्रचण्ड (भिडियोसहित)

काठमाडौं– पूर्वराष्ट्रपति एवं नेकपा एमालेकी वरिष्ठ नेता विद्यादेवी भण्डारीको पछिल्लो चीन भ्रमणलाई लिएर राजनीतिक वृत्तमा अनेक अड्कलबाजी र संशय उब्जिएका छन् । एमालेको सक्रिय राजनीतिमा पुनरागमन भएलगत्तै भएको उनको पहिलो विदेश भ्रमणलाई केवल सामान्य सहभागिताका रूपमा मात्र हेरिएको थिएन । भण्डारी बेइजिङ उडेपछि राष्ट्रिय राजनीतिमै नयाँ समीकरण बन्ने र विशेषगरी वामपन्थी एकताले गति लिनेसम्मका विश्लेषण भए ।
११ वर्षपछिको सक्रिय दलीय राजनीति र उनको भावी भूमिकाबारे अनेक चर्चा चलिरहेकै बेला यो भ्रमण भएको थियो । त्यसो त, दुई कार्यकाल राष्ट्रपति रहँदा भण्डारीले चीनसँगको सम्बन्धलाई उच्च प्राथमिकता दिएकी थिइन् । चिनियाँ राष्ट्रपति सी चिनफिङसँग विगतमा उनको निकै सुमधुर सम्बन्ध रहेका कारण यसपटक पनि सीसँग उच्चस्तरीय भेटवार्ता हुने अपेक्षा स्वाभाविक थियो । विगतको त्यही सम्बन्धले उच्चस्तरीय राजनीतिक संवादको ढोका खोल्ने अनुमान गरिएको थियो । तर, भ्रमण कुनै राजनीतिक भेटवार्तामा प्रवेश नै नगरी सम्मेलनमा सहभागिता र सार्वजनिक तहको संवादमै सीमित बन्यो । स्वदेश फर्किएलगत्तै त्रिभुवन अन्तर्राष्ट्रिय विमानस्थलमै उनले आफ्नो भ्रमण राजनीतिक नभई चीनको हेबोई प्रान्तस्थित स्योङआनमा आयोजित ‘ग्लोबल गभर्नेन्स फोरम’मा सहभागिता र सम्बोधनका लागि मात्र भएको स्पष्टीकरण दिइन् ।