बुझाइको त्रुटिले गाजामा राष्ट्रसंघका कर्मचारीसहित १४ स्वास्थ्यकर्मीको मृत्यु भएको इजरायली सेनाको स्वीकारोक्ति

काठमाडौं—इजरायली सेनाले गत महिना गाजामा आपतकालीन सेवामा कार्यरत चिकित्सकसहित १४ स्वास्थ्यकर्मीको मृत्यु ‘बुझाइको त्रुटि’ का कारण भएको जनाएको छ । यस घटनाको अनुसन्धानका क्रममा इजरायली सेनाले थुप्रै कमजोरीहरू फेला पारेको जनाएको छ ।

सेनाको प्रतिवेदनमा सम्बन्धित युनिटका कमाण्डरलाई ‘सोधपुछका क्रममा अधुरो र गलत रिपोर्ट दिएको’ पत्ता लागेपछि बर्खास्त गरिएको उल्लेख छ । गत मार्च२३ मा प्यालेस्टिनी रेड क्रिसेन्ट सोसाइटीको एम्बुलेन्स, संयुक्त राष्ट्रसंघको एउटा सवारीसाधन र एउटा दमकलमा इजरायली सेनाले गोली चलाएको थियो ।

सो घटनामा आपतकालीन सेवामा कार्यरत १४ जना कर्मचारीहरू र संयुक्त राष्ट्रसंघका एक कर्मचारीको मृत्यु भएको थियो ।सो घटनाको पूर्ण जानकारी मृतक एक स्वास्थ्यकर्मीको मोबाइल फोनमा रेकर्ड भएको भिडियो फुटेजबाट पत्ता लागेको थियो ।