काठमाडौं– नेपाल प्रहरीको नेतृत्व परिवर्तनबारे राजनीतिक वृत्तमा सुरु भएको बहससँगै प्रहरी महानिरीक्षक दानबहादुर कार्कीको पदलाई लिएर चासो र संशय बढेको छ । प्रधानमन्त्री बालेन्द्र शाह र राष्ट्रिय स्वतन्त्र पार्टी (रास्वपा)का सभापति रवि लामिछानेबीच बुधबार भएको करिब चार घण्टा लामो भेटवार्तालाई अर्थपूर्ण रूपमा हेरिएको छ । रास्वपा स्रोतका अनुसार प्रधानमन्त्री शाह आफैँ लामिछानेको बूढानीलकण्ठस्थित निवासमा पुगेका थिए । भारत भ्रमणबाट फर्किएका लामिछानेसँग भएको उक्त भेटमा सत्ता समीकरण, पार्टी, सरकार, सांसदहरूसँग सम्बन्धित विवाद तथा कर्मचारी प्रशासनसम्बन्धी विधेयकलगायतका समसामयिक विषयमा छलफल भएको बताइएको छ । आईजीपी कार्कीलाई हटाउने विषयमा दुई नेताबीच सहमति भएको हो वा होइन भन्नेबारे दुवै पक्षबाट औपचारिक पुष्टि भने हुन सकेको छैन । निर्वाचन प्रहरीका लागि पोसाक तथा जुत्ता खरिद प्रकरणमा भएको भनिएको अनियमितताको आरोप, प्रहरी प्रमुखको कार्यशैली र राजनीतिक नेतृत्वबीचको टकरावले यतिबेला नयाँ बहस जन्माएको छ । आईजीपी कार्कीले राजीनामा नदिए मन्त्रिपरिषद्बाटै निर्णय गरेर हटाउने तयारी भइरहेको बालुवाटार स्रोतको दाबी छ । उता विगत एक सातादेखि मन्त्रिपरिषद्को नियमित बैठकसमेत बस्न सकेको छैन ।
देश
प्रतिक्रिया