विश्व तर्साउने दृश्य, सीलाई ट्रम्पले दिए इतिहासकै दुर्लभ सम्मान, दुई महाशक्ति किन मिले ? (भिडियोसहित)

काठमाडौं– अमेरिकी राष्ट्रपति डोनाल्ड ट्रम्पले चिनियाँ समकक्षी सी चिनफिङलाई वासिङ्टनमा ६ दशकयताकै दुर्लभ र भव्य कूटनीतिक सम्मानसहित स्वागत गरेका छन् । तीनदिने उच्चस्तरीय शिखर सम्मेलनका लागि बुधबार साँझ मेरिल्यान्डस्थित ‘जोइन्ट बेस एन्ड्र्युज’ विमानस्थलमा अवतरण गरेका सीलाई ट्रम्प दम्पतीले १०० फिट लामो रातो कार्पेट, सैन्य ब्यान्ड र अत्याधुनिक लडाकु विमानको हवाई सलामी (फ्लाईओभर) का साथ स्वागत गरेका हुन् । सन् १९६२ मा तत्कालीन राष्ट्रपति जोन एफ केनेडीले बेलायती प्रधानमन्त्री ह्यारोल्ड म्याकमिलनलाई विमानस्थलमै पुगेर स्वागत गरेयता कुनै पनि बहालवाला अमेरिकी राष्ट्रपतिले विदेशी राष्ट्रप्रमुखलाई यसरी स्वागत गरेको यो पहिलो पटक हो । एयर चाइनाको विशेष विमानबाट प्रथम महिला पेङ लियुआनसहित ओर्लिएका राष्ट्रपति सीलाई ट्रम्प र प्रथम महिला मेलानिया ट्रम्पले हार्दिकताका साथ हात मिलाएर स्वागत गरे । अमेरिकी सेनाको ब्यान्डले राष्ट्रिय धुन बजाउँदा आकाशमा अमेरिकाको मुख्य रणनीतिक मारक हतियार मानिने दुईवटा ‘बी–वान’ सुपरसोनिक विमानले हवाई सलामी दिएका थिए । सन् २०१५ पछि सीको यो पहिलो वासिङ्टन भ्रमण हो ।