परराष्ट्र मन्त्री राणा इटाली प्रस्थान

परराष्ट्र मन्त्री डा.आरजु राणा देउवा खाद्य तथा कृषि सङ्गठन (एफएओ) कन्फ्रेन्समा सहभागि हुन आज इटाली प्रस्थान गरेकी छन् । इटालीको रोममा जुन २८ देखि जुलाई ४ सम्म आयोजना हुने खाद्य तथा कृषि सङ्गठन (एफएओ ) कन्फ्रेन्सको ४४ औँ सत्रमा सहभागी हुन मन्त्री राणा त्यसतर्फ प्रस्थान गरेकी हुन् ।

उनले सो कन्फ्रेन्सको प्रमुख सत्र र यसका दौरानमा आयोजना हुने अन्य उच्चस्तरीय कार्यक्रमहरूलाई सम्बोधन गर्ने कार्यक्रम रहेको छ । उक्त सम्मेलनपश्चात् मन्त्री राणा इटालीको मिलान तथा जर्मनीको ह्याम्बर्ग र बर्लिनमा लगानी बोर्ड नेपालद्वारा आयोजित कार्यक्रमहरूमा सहभागी हुने कार्यक्रम रहेको उनको निजी सचिवालयले जानकारी दिएको छ ।

भ्रमण टोलीमा अस्ट्रियाका लागि नेपाली राजदूत तथा एफएओका लागि नेपाली स्थायी प्रतिनिधि एवं परराष्ट्र र कृषि तथा पशुपंक्षी विकास मन्त्रालयका अधिकारीहरू सहभागी रहेका छन् ।