मधेस प्रदेशमा बजेटको छलफलमा सहभागी नहुने विपक्षी पाँच दलको निर्णय

काठमाडौं—मधेस प्रदेशको आगामी आर्थिक वर्षको बजेटलाई लिएर सरकारको नेतृत्वकर्ता दल जनमत पार्टी नै असन्तुष्ट भएर सरकार नै छाड्नेसम्मको चर्चा भइरहँदा विपक्षी दलले पनि बजेटको छलफलमै सहभागी नहुने निर्णय गरेको छ ।

बिचौलियाको स्वार्थमा रेडबुकममा बजेट राखिएको भन्दै पाँच विपक्षी दलले संयुक्तरुपमा सदनको बैठकमा सहभागी नहुने निर्णय गरेको माओवादीका प्रदेश सांसद युवराज भट्टराईले जानकारी दिए । उनका अनुसार बिहीबार बसेको विपक्षी मोर्चाको बैठकले बजेटमा बिचौलियाको प्रवेश भएको ठहर गरेको छ । त्यसकारण बजेटको बारेमा हुने कुनै पनि छलफलमा नजाने विपक्षी मोर्चाको निर्णय गरेको उनले बताए ।

मधेस सभामा विपक्षी मोर्चामा माओवादी केन्द्र, नेकपा एकीकृत समाजवादी, जनता समाजवादी पार्टी नेपाल, राप्रपा र नेपाल संघीय समाज वादी पार्टी रहेका छन् । सत्ताको नेतृत्वकर्ता दल र प्रतिपक्षले समेत बजेटको विषयमा विरोध जनाउन थालेपछि प्रदेशसभाको बैठक अर्को सूचना प्रकाशन नहुँदासम्मको लागि स्थगित भएको प्रदेश सभा सचिवालयले जनाएको छ ।

कांग्रेसका अर्थमन्त्री सुनिल यादवले जनमत पार्टीबाट मुख्यमन्त्री बनेका सतिशकुमार सिंहलाई समेत बाइपास गरेर बजेट ल्याएको आरोप लागेको छ । बजेटमा बाइपास गरिएको भन्दै जनमतले सरकारमा बस्ने वा छोड्ने भन्ने विषयमा छलफल थालिसकेको छ । मधेस सरकारले १ असारमा ४६ अर्ब भन्दा बढीको बजेट ल्याएको थियो ।