रविका जिक्री प्रमोदलाई अन्याय, सपुतलाई बालेनको धोका, रिमा जस्ता ४८ महिलालाई मौका (भिडियोसहित)

काठमाडौं— चर्चित अनुहारहरू रहेको राष्ट्रिय स्वतन्त्र पार्टी (रास्वपा)को समानुपातिक बन्दसूचीबाट को–को सांसद बन्दैछन् भन्ने पर्खाइको घडी समाप्त भएको छ । प्रत्यक्षका साथै समानुपातिकतर्फ पनि सर्वाधिक धेरै मत प्राप्त गरेको रास्वपाले समानुपातिकबाट मात्रै ५७ सिट पाएको थियो । दलबाट ३३ प्रतिशत महिला अनिवार्य हुनुपर्ने व्यवस्थाका कारण ५७ मध्ये ४८ जना महिला र ९ जना पुरुष रास्वपाको समानुपातिकबाट निर्वाचित हुने भएका हुन् । तर, सभापति रवि लामिछानेका विश्वासपात्रदेखि चर्चित अनुहारहरू नै यसपटक समानुपातिक कोटाबाट संसद् छिर्न नपाउने भएका छन् । यसअनुसार प्रमोद न्यौपाने, ज्ञानेन्द्र मल्ल र प्रकाश सपुत जस्ता चर्चित अनुहारहरुकै संसद् छिर्ने सपना पूरा नहुने भएको छ । रास्वपाले समानुपातिक सांसदमा निर्वाचित गर्न निर्वाचन आयोगमा बुझाएको ५७ जनाको सूचीमा यी नामहरू समावेश हुन सकेनन् । रास्वपाको खस–आर्यतर्फ पुरुषमा रमेश प्रसाईं मात्रै सिफारिस भएका छन् । उनी उक्त क्लस्टरको पहिलो नम्बरमा थिए भने दोस्रो नम्बरमा रहेका सुदीप ढकाल र तेस्रो नम्बरका प्रमोद न्यौपाने सूचीमा अटाउन सकेनन् । रास्वपाले खस–आर्यतर्फ १६ जना महिला उम्मेदवार सिफारिस गरेको छ । सुदीप र प्रमोद रविका निकट मानिन्छन् । यो सूचीमा प्रमोद नपर्दा रास्वपाकै नेताहरूले असन्तुष्टि जनाइरहेका छन् । रवि लामिछानेका हरेक उतारचढावका सहयात्रीका रूपमा चिनिएका प्रमोद नअट्दा पार्टीभित्र मात्रै नभई बाहिर पनि चर्चा भइरहेको छ । सञ्चारकर्मीको पृष्ठभूमिबाट आएका प्रमोद कुनै समय सभापति लामिछानेका सहकर्मीसमेत थिए ।