ओलीको साख जोगाएका महेशलाई पुरस्कार, सचिवमा एक नम्बर, एमाले अब हाहा हुहुतिर…? (भिडियोसहित)

काठमाडौं— एमालेको ११ औं राष्ट्रिय महाधिवेशनबाट सचिव पदमा सर्वाधिक मतले विजयी भएका महेश बस्नेतले पदाधिकारीमा डेब्यु गरेका छन् । एमालेको सङ्कटमा उद्धारकर्ता बनेर उभिएका महेशलाई एमाले प्रतिनिधिहरूले पनि महाधिवेशनमार्फत उद्धार गरे । बस्नेतले सचिवमा जितेका मात्रै छैनन् नौ सिटका लागि २० जनाको प्रतिस्पर्धामा पहिलोसमेत बने । सङ्घमा मन्त्री भएकादेखि प्रदेशका मुख्यमन्त्रीहरूलाई समेत पाखा लगाउँदै १५ सय ४४ मतसहित उनी निर्वाचित भएका हुन् । होनहार प्रतिष्पर्धीसँगको भिडन्तमा पहिलो नम्बरमा निर्वाचनबाट सचिवमा अनुमोदन भएका बस्नेतले पदाधिकारीमा सानदार इन्ट्री गरेका छन् । गुण्डुको गुण्डासमेत भनेर आलोचित बनेका उनले ती सबैलाई चुप गराउँदै लोकतान्त्रिक अभ्यासबाट नै आफूलाई नेतामा परिणत गराउन सफल भएका छन् । सचिवमा निर्वाचित भइसकेपछि उनी झन् रवाफिलो देखिएका छन् ।