एमालेमा ओली हटाउन टिम बन्दै, विद्याको मोर्चा कमान्डर ईश्वर, योगेशको चुनौती, बचाउमा झाँक्री (भिडियोसहित)

काठमाडौं— जेनजी आन्दोलनपछि पनि पार्टीको नेतृत्व छाड्न तयार नदेखिएका एमाले अध्यक्ष केपी शर्मा ओलीको विकल्प खोज्न पार्टीमा तीव्र तयारी सुरु भएको छ । दबाबबाट अध्यक्षले ठाउँ नछोड्दा महाधिवेशनबाटै उनलाई बहिर्गनका लागि प्रयास सुरु भएको हो । यसको नेतृत्व भने पार्टीको साधारण सदस्य समेत बन्न नपाएकी पूर्वराष्ट्रपित विद्यादेवी भण्डारी पक्षले गरिरहेको छ । र, अग्रस्थानमा छन् वरिष्ठ उपाध्यक्ष इश्वर पोखरेल । तेस्रो कार्यकालका लागि ओलीले आफूबाहेक अरु नेतालाई बोल्न समेत सार्वजनिक प्रतिबन्ध लगाउँदा भण्डारी पक्ष भने प्यानलसहित ओलीसँग प्रतिस्पर्धा गर्ने तयारीमा जुटिरहेको हो । पोखरेललाई बहुमत पदाधिकारीले साथ रहेको दाबी गरिन्छ । उपमहासचिव पृथ्वी सुब्बा गुरुङ र सचिव योगेश भट्टराई पोखरेलकै प्यानलबाट महासचिवका लागि प्रतिस्पर्धामा छन् । उपाध्यक्षहरु अष्टलक्ष्मी शाक्य, सुरेन्द्र पाण्डे, युवराज ज्ञवाली लगायत नेताहरु लोकतान्त्रिक पद्धतिबाट नै ओलीलाई हराउनुपर्ने कितामा उभिएका छन् । यता सचिव रामबहादुर थापा (बादल) र उपाध्यक्ष विष्णु पौडेल अझै अनिर्णित छन् । ओलीलाई सम्मानजनक विदा लिएर प्र्रतिस्पर्धा नगर्न र आफुहरुसँग प्रतिस्पर्धा गरे इज्जतमा नै ठेस लाग्ने सम्म सचिव भट्टराईले चुनौति नै दिएका छन् ।