चौतर्फी दबाबमा जाँचबुझ आयोग, सर्वोच्चमा मुद्दा, एमालेको थ्रेट, प्रमाण जुटाउन देश दौडाहा (भिडियोसहित)

काठमाडौं— अन्तरिम सरकारले जेन–जी आन्दोलनका क्रममा भएका घटनाको सत्यतथ्य छानबिन गर्न बनाएको उच्चस्तरीय जाँचबुझ आयोगले काम सुरु गरेको एक महिना बितेको छ । असोज ५ गते बसेको मन्त्रिपरिषद्को बैठकले पूर्वन्यायाधीश गौरीबहादुर कार्कीको अध्यक्षतामा गठन गरेको तीन सदस्यीय जाँचबुझ आयोगले त्यसको चार दिनपछि अर्थात् असोज ९ गतेदेखि काम थालनी गरेको थियो । काम थालेको एक महिना भइसक्दासम्म आयोगले विवरण सङ्कलन गर्नेदेखि घटनास्थलमा नै गएर निरीक्षण गर्ने काम गरिरहेको छ । हाल हेटौँडामा रहेका आयोगका अध्यक्ष कार्की त्यहाँबाट मधेश प्रदेशको पश्चिमी भागहरूमा पुग्ने कार्यतालिका छ । त्यस्तै, सदस्य रहेका पूर्वएआईजी विज्ञानराज शर्माले विराटनगरलगायतका क्षेत्रमा एक चरण भ्रमण गरिसकेका छन् भने अब पोखरालगायतका क्षेत्रमा पुग्ने योजना छ । अर्का सदस्य विश्वेश्वर भण्डारी नेपालगञ्जलगायत पश्चिम क्षेत्रका केही ठाउँको स्थलगत भ्रमण गरेर सूचना सङ्कलन गर्ने तयारीमा छन् । यसअघि आयोगले सरकारी भवन, उद्योग–व्यवसाय तथा निजी घरहरूको क्षतिको विवरण मगाएकोमा प्राप्त विवरणको अध्ययन भइरहेको छ । आगजनीमा रासायनिक पदार्थको प्रयोग भएको भन्ने विषयमा पनि आयोगले प्रहरीको विधिविज्ञान प्रयोगशालालाई आगजनीको अवशेषबाट सत्यतथ्य पत्ता लगाउन आग्रह गरेको छ । भदौ २४ गतेको घटनासँग सम्बन्धित करिब ३० हजारभन्दा बढी भिडिओहरू प्राप्त गरेको आयोगले प्रहरीको साइबर विज्ञमार्फत त्यसको छानबिन गराइरहेको छ । त्यस्तै, २३ गते प्रयोग भएका गोलीको पनि हतियारविज्ञबाट जाँच गराइएको छ र गोली लागेकाहरूको पोस्टमार्टम रिपोर्टहरू मगाइए पनि हालसम्म प्राप्त नभएको जाँचबुझ आयोग सम्बद्ध स्रोतले बताएको छ । पहिलो चरणमा बानेश्वर क्षेत्रमा खटिएका नेपाल प्रहरी, सशस्त्र प्रहरी र राष्ट्रिय अनुसन्धान विभागका कर्मचारीहरूको विवरण आयोगले प्राप्त गरिसकेको छ र अब बयान लिने काम अघि बढाउनेछ । यसरी कार्यतालिका नै बनाएर काम गरिरहेको आयोगलाई राजनीतिक दलहरूले भने चुनौती दिइरहेका छन् ।